兄弟

繼上週姊妹後，又輪到做返兄弟。今次真係可喜可賀，兩啖日本芥辣加幾個簡單動作就大功告成，絕對係舉手之勞。另一個簡單任務係幫新郎駕駛部日本名貴大房車一早出發去千里送嫂，大家義氣兄弟無論點樣都一定義不容辭，全程管接管送之餘更加要睇頭睇尾，招呼周到之餘搬上搬落更不在話下，最後守門口到安排坐位都一一做到真係絕無偷懶。但可惜第二日要返工，結果一大班兄弟姊妹團宴後到酒吧狂歡都未能出席。不過無論點都好，都在此衷心祝福關二哥同關二嫂永結同心，歷久常新，恭喜恭喜。

姊妹

兄弟做得多，姊妹都係第一次。原來做姊妹真係爽好多，無高難度動作，毋需食辣飲醋，更不用奇裝異服犧牲色相，兼且重有開門利是分，可以講得係又食又拎。原來真姊妹又真係唔係咁易做，又要坦胸露臂，雙面膠紙黐到又紅又痛，高跟鞋撐上撐落，set 頭又扯到頭痕 (原來解返個頭要用成樽護髮素)。
菁姐華哥，眼見你地之前行咗咁多年，前面嚟緊重有漫漫長路但係大家都知道真係唔使為你哋擔心，慢慢行。

顧全大局

某個旅途中所見：

要提倡顧全大局，每一個黨員、每一種局部工作、每一項言論或行動，都必須以全黨利益為出發點，絕對不許可違反這個原則。

某些時候，個人認為毛先生的所言所行並非全無可取的地方。以上一段說話，若然放在其他團體或組織，而又能做到的話，大家就唔使咁惱懆。記得，記得。

冰冷的手

每逢到寒冬季節，駕車出外總會有點心理鬥爭，事關當車開到公路上時，便會感覺到寒風就像一對冰冷的手從衣袖不斷的鑽入，沿著雙臂爬進衣服之內，再肆無忌憚的撫摸遍全身，最後停留在心口，寒意久久亦未能散去。還記得在十多年前一次需往新界北區的突發性夜間偵查個案，在十度以下的氣溫當中就算是穿著皮褸亦難敵寒風凜冽，一來一回兩程後回到家中感覺全身血液都似凝固了一樣。亦有一次在相同氣溫中前往新界西的運載工作，一停下來便要馬上買一杯熱飲暖和一下。幸好香港每年亦只得數天有如此寒冷的天氣；要頂，重頂得住。

天祐新娘

今天其中一位的主禮人講述了一段訓勉的說話，其中有許多許多的相信只有一對新人才能充分了解，不過到今天才發現原來教會中有類似社工般的職位，幫助教友們進行輔導工作的。一直以來，都覺得會用心聆聴及接受別人輔導或勸勉的人是幸福的；能交出自己內心感受和願意與別人分享生活的點滴，已經表示他們找到了可以信任的人；加上能虛心接受別人意見，更可以有機會從別人經驗中取得有用的建議，絕對是獲益良多。有某一類人經常死牛一面頸兼話極唔聴，相信是很難可以有人願意去對他們作出勸勉及幫助的，此等人唯有自求多福或參考別人的說話以求從中偷師獲益。

這一段訓勉說話中，講者提到溝通原來是有分層次的。由招呼稱謂、交換資料、表達意見、講出感受、以及關切關心的交流等五個層次。按此一循循善誘之訓勉，相信一對新人一定可以深明溝通之奧義，琴瑟和諧。

 

陳小姐，祝你婚姻幸福，生活愉快。

遠見

故事一則﹝據聞真人真事，但實情無從稽考﹞
新任牛津大學校長巡視校園時發現某大樓門廊的某幾根木柱開始腐爛，於是找承建商打算更換，經檢查後發現所用的並非常用木材，而且要有數尺之粗壯以支撐門廊需要起碼一百年以上的生長時間，找另類材料的話又不能夠與其它原有木柱保持統一的外觀，也總不成因數根木柱而將舊有的全部更換，造成龐大開支。
正傷腦筋之時剛好碰上了某位董事，一問之下原來早於數百年前校方已有就此問題作出計劃，所以大學的資產中包括了在英國某森林中的一塊土地，用途乃種植校方建校時所採用過的木材以待日後維修更換之用，以求可以一直保持原有之建築風格及傳統外觀。此為之有遠見、有計劃之典範。

近日公佈世界杯主辦國，又想起當年北京成功申辦奧運。兩年後世界上經歷了非典型肺炎一役，大家除了發現此疾病之傳染性外亦得悉原來傳染病及有關資料在我國是屬於國家機密。在奧運舉行前兩年，世界衛生組織進行了任期為時五年的總幹事選舉，中國首次提名候選人參加競選並成功獲得此職位。
在投票時期，湊巧地中方舉行了中非高峰會議邀請了四十多位非洲國家領導人到北京聚會，而在新聞訪問中某非洲執委成員透露只按該國元首指示投票。及後再了解原來唯有總幹事一職才有權力決定是否將某區宣佈為疫埠，亦擁有唯一權力發出旅遊警告。未知此是否有遠見、有計劃之典範。

後記：原來陳馮富珍當年身為署長但拒絕到淘大花園﹝絕不能怪責特首夫人全武行去視察疫情﹞；當年沈祖堯要求關閉威院部份服務，高永文不贊成﹝今天大家在讚高永文是沙士英雄﹞；當年香港醫學會拒絕接見在越南以隔離方法有效控制疫情的無國界醫生，當時的會長勞永樂表示香港不需要他們的援助﹝這算是個怎樣的傳染病科醫生？﹞；查看舊聞形容前任世衛總幹事李鍾郁是突然病逝﹝希望這不是有遠見、有計劃之典範﹞

樂於助人

早前跟一位久違了的朋友茶聚，其間討論提到行善及助人的問題。

朋友曾出於關心而主動聯絡並幫助一個本是陌生人的家庭，多年後他們已經成為好朋友。其間時移勢易，雙方都經歷了起落升跌，友人以為曾真的伸出援手，但事實上該人家絕對不屈不撓更激勵了友人堅持信念，實情到底是誰幫了誰朋友深信自己才是受惠者。

讀過一本書提及作者要貢獻出人生中的二十四個月做義工服務，友人聽後不以為然。蓋助人之舉實毋須限時限刻，著書立說更加似有沽名釣譽之嫌，以為自己偉大施援實質對方對你之拖捨其實絕不稀罕。到最後是滿足了別人的需要還是滿足了自己的虛榮？

曾經聽過有人大談自己有捐助慈善機構，又云受助的人如何可憐，一番偉論之後結果是最後一句令在下留下深刻印象：好心有好報嘛。原來如何大義凜然背後也只因篤信可以為自己積善積德，帶來益處。

輸少當贏

講到知足，區區的確能心領神會，所以要做到心常樂並不困難。但要達至無求境界實非易事，故此在下的品格絕不清高。比較喜歡的兩句是：

 

人世輸贏無常局

貧賤吾家有素風

 

沒那麼高不可攀，更覺它很扎實的描繪了區區生平。世事無常早已深深體會，回顧一生實情的確輸多贏少，貧賤出身毋庸置疑，養成素風皆因天生寒底。

一技旁身

上周參觀了攝影工作，突然又再想起一事無成這說話。在市道低落或不懂人情世故之下，是很可能會遇上仕途慘敗的。如果懂攝影，總算有一門手藝，成不了名家也可以幫人拍拍照賺點錢。如果懂繪畫，也是一技之長，做不了大師也可以畫畫插畫可以糊口 (實情何止可以糊口)。如果懂寫作，當不上文豪也可以寫寫專欄或試投稿拿點稿費。如果懂音樂，都是不要談音樂，玩音樂的大多是潦倒收場。
近日看書才知道原來沈從文自年少經已輟學，成為名作家都是從不斷的寫作中成長出來的，不過天分當然也是一個主因，不見得很多每天寫作的人都出得了好作品。話說回來，好與不好在下事實上是不懂區分，曾看過不少文學鉅著，但都不明所以能成為鉅著的原因，相信亦都是與天分有關吧。寫作如是、繪畫如是、攝影如是、音樂如是，不懂之餘更不懂欣賞，再加上沒有專長，這類人一般的形容都會是"二趾長過公".....

進退失據

年少讀書時喜歡的科目是物理；聲音是物體震動而成，顏色是不同波長的光線，星體運行是萬有引力，化學反應是物質交換了電子形成離子鍵而改變特質，生物的感覺是神經電荷的傳遞，壓力變化引致空氣流動；原來一切事情都有理可尋，物體下墜會有固定加速率，排水量五十公升重量就等於五十公斤，簡單直接就如等價交換，所有問題無須一味靠估。

不過物理的現象原來是很巧妙的；順風而行似會減低阻力，但慢於風速又會被推頂著，當速度比風更快又會相對變成逆風而行；就像要跟車流同樣速度才能捕得清楚影像，行進要跟著氣流才可以走得從容。

尋釁滋事

坐下廣場唔食飯會畀人告，調查豆腐渣工程又宣判有罪，關心國內愛滋病人又係犯法，維護人權又不得入境，幫人打官司又會被人打，家陣連買錯毒奶粉都要坐監。國家開放改革的路上唔止係要摸住石頭過河，更加要留心有無人拎住石頭揼你一鑊。重要好似在下咁近排頻頻進出內地又四周圍影相生事，會唔會又畀人以為係假扮遊客當我潛偽窺私，下次再到神州暢遊時可能真係要擔心被人捉住毒打。不過就算唔計北上，我呢種人成日多多聲氣兼得罪人多稱呼人少講多錯多，到底又係唔係都已經被列入埋尋釁滋事一類呢？

愚樂無窮

看到了一個關於魚的傳聞，說魚原來只有七秒的記憶；想起了之前看過一位女孩子的文章。
傷心過後，她希望自己可以是魚，那就可以每隔七秒便忘記所有不愉快的事情。只要是魚，躲在水中就沒有人會看到她流淚；只要是魚，每過七秒後所有的事物都變成新的了；只要是魚，就算是被困在小小的魚缸裡也會覺得永遠活在新天地。
她希望可以用魚的方式去愛一個人... 如果是魚，就只會有七秒鐘的痛苦；如果是魚，曾經做過的事都可以煙消雲散；如果是魚，可以每隔七秒便重複又重複地再愛上他。
可惜，人是當然不可能變成魚的。不會是魚，重複愛錯只會讓人看到不斷流淚；不會是魚，便不可以永遠將自己困在無形的魚缸之中；不會是魚，七秒一過就什麼都忘記的叫做老人痴呆柏金遜。

難寫攔漓

三天的桂林遊的確是難捨難離，很多想去的景點又不夠時間去，本以為是沿江遊桂林，但原來從市內到碼頭會先避過所有市內景點，而就算經過都會有特別的方法阻攔你視線，結果是不能觀光；正確說是不付錢是不能觀看。為甚麼不能在更上游的地方開始漓江漂流呢？這令我想起剛看完的一本自傳內寫的一個觀點﹝大意是﹞：發展旅遊不只是為了賺錢，也決不是僅僅售賣紀念品，而要以 "自己擁有，也給予他人" 這與人分享的精神。
第一天是漓江遊，在大陸永遠是灰矇的天氣，遠看的看不清。而船家指出的又往往要以十二分的想像力才能體會，要我寫出有看過甚麼風景，我覺得十分困難，不過山水優美又沒有令人失望。之後到的興坪古鎮都頗有風味，如果問我，我會更喜歡像之前犍為的小鎮，簡樸而悠閑。晚上的西街遊都是錦里貨色，不可以說不好，行行走走看看買買沒有甚麼不好，如果不是只帶了個小背囊的話都可以有成交的，感覺上只可以說是熟口熟面。印象劉三姐就真的沒信心，對故事熟識點的話相信會更想看一些。
第二天是陽朔遊，騎單車輕輕鬆鬆的遊走絕對是賞心樂事，如果有清楚的地圖可以自己漫走就的確一流，回來後再看指南原來部份介紹的路線都在大榕樹景區，即是說原來不付錢是不能觀看。其中有過橋的地方可能是較遠或亦在圍版範圍內所以真的去不到。
第三天是古東遊，絕對好流，可幸之後的大墟古鎮亦有少少看頭，破爛無復修其實都算係合情合理，如果再帶多點錢的話應可以再去冠岩見識一下。見之前友人出遊無論任何景點及山水秀都付錢暢遊，劉三姐及漓江舟180佢接受，西藏寺廟山莊亦照付款入去走一走，不禁令我要想一想自己是否一個剫縮寒友。不過再認真地想，如果真的是不值一哂又絕對沒理由要貼錢買難受。

做人處世

做人樹為榜 本固任隨枝葉動
處世錢作樣 內方更要四邊圓

行經旅遊景點，想起了很久以前在朋友家中見到的一幅字畫。畫是友人的世叔伯送贈與友人父親的，從友人的為人及其生意看來，似乎此幾句金石良言的確讓他在做人處世上獲益非淺。可惜友人早於年前騎鶴仙遊，的確令人惋惜；待人接物謙遜有禮有所作為的郤要英年早逝，遺下吾等處處凌角庸庸之輩在世上無所事事。所謂虎父無犬女，但願他的小女兒將來亦能像父親一樣成就一番事業。

滄海杳然

在年多前，偶然看到是逐步被填海工程收窄的維港；有感而發慨嘆了一句滄海桑田。今天見證了的原來連滄海都快要看不見；正所謂一山還有一山高，當日這大廈建起的時候阻礙了後面建築物的景觀，現在它曾經擁有的無敵海景亦終於被完全遮擋。世界輪流轉，與其繼續留戀舊日美景，不如向世界出發；又是時候出外去大開眼界了。

地下鐵路 為你建造

昨日的球賽地點為地下鐵路車廠員工康樂中心，原來地鐵員工的福利都算唔錯，康樂中心內除球場外更加有健身室、酒吧、卡拉ok等真係乜都有。作為八達通大股東佢賣哂我地的個人資料賺埋賺埋都唔係完全淨袋，至少有益下佢內部員工，就連我呢種一味靠黐的無賴都可以受惠。見我朋友細屋換大屋，就知道地鐵絕對唔刻薄員工 (被剝削及被裁的員工除外)。今次去完問開先知據聞屬於高層級別以上的員工唔止可以享用康樂中心而且更加可以租用遊艇，只可惜就算你係高層都要排隊申請兼且經常爆滿。
話說回來，點解一向租開政府球場又會要去地鐵車廠入面打？只因在下近來經常外遊無人book場之過。豪哥，要你百忙中抽空去book場，阻住你開工.... 唔好意思...

三國遊終 - 布拉格 下集

最後兩日係友人及友人妻的血拼日，而亦都係天氣又轉回晴朗的兩天，正好係我獨自去偷歡的好機會。雖然熱門景點行過哂，但亦有其他次熱景點可以選擇，加上日前天氣唔好，趁呢兩日經過可以再補拍靚相。而且更加有時間到橫街窄巷同非主要旅遊區睇下有無發現，結果真係買到好幾件心水貨品。其實可以悠閑咁四圍逛的確係唔錯，起碼自己以為經已有發掘過呢個城市，而且重熟習埋當地的巴士電車地鐵咁，想去任何一個主要區域都無問題；行下行下發現布拉格真係有好多好舒服的地方，亦可能係因為呢個原因，成個行程最鍾意就係呢度。最後重在一個商場入面的一間大型運動用品舖買到個背囊，為未來的旅程作好準備。

三國遊終 - 布拉格 上集

終於去到行程最後一個城市，本來係計劃在此為基地再搭車去多一兩個其他城市，但係友人又突然決定唔好再走來走去，結果更估唔到係在此留咗五日。其實呢個都係完全無一早預定所有交通同酒店的好處，行程有彈性，而且間有驚喜；好似坐巴士時我刨哂幾本指南搵定幾間可靠的酒店，但係在巴士入站前的一刻又見到站旁有間三星級的，把心一橫提議不如去問下，以免友人的新篋又要長途跋涉；點知呢間就係全個旅程最平同最靚的酒店，間房又大，設備齊全，又有露台，又近地鐵同巴士站；如果唔係在最後一日先知原來在呢個巴士站有車去其他市鎮，最後兩日就可以做下獨行俠去下其他世遺小鎮，可惜之前的旅遊指南只講在另一巴士站先有車，只怪自己無細心留意。在布拉格用兩日經已行完所有有介紹的行程，兼有時間行埋幾間博物館，亦已有一日的清晨趁無人到最出名的查理橋影相。

三國遊終 - 克魯姆洛夫

乘坐十點半的火車去到已經係五點半，由於友人係拖篋的，當地大部份路面都係用碎石鋪的小路，落車後顛簸咗一輪已經決定搵最近的酒店落腳，不過又咁啱搵到間幾有特色的酒店。落腳後趁天未黑立即出外四圍遊覽，其實呢度好細，要行的話好快行完，不過風景咁靚，只係坐低慢慢睇都可以過一日。而且﹝部份﹞當地人又非常友善﹝不過就個個都唔多見有笑容﹞，有間CD舖個老闆娘重好有耐性咁介紹古典音樂同波希米亞音樂；而在最後一間食午餐的餐廳亦都招乎周到，問佢播緊隻係乜野歌又馬上搵畀我，見佢餐牌有講當地食物的歷史問佢佢又馬上將英文的幾頁送畀我，真係唔話得兼值得介紹。餐後就坐三點鐘巴士出發，在六點到達布拉格。

三國遊終 - 格拉茲

其實呢個地方的景點都好集中，又係粗粗地半日行完，亦係因為前一晚食晚飯搵餐廳時都行咗一轉；其實呢招幾好，之前行過第二日可好快咁知道點行。剩半日時間，可以選擇的有：早少少起程去多個小鎮，或者早日返去維也納行埋未去的景點，又或者悠閑半日四圍逛；結果係選咗悠閑逛街。其實四圍咁行下都算係發掘一個地方的好方法，據在酒店攞到的指南講格拉茲係個文化美術之都，原來佢的主要呃遊客街道中真係有好多有少少藝術氣氛的店舖，賣好多把鬼的有特色小玩意，用嚟做手信真係好過在手信店買到的千篇一律的貨仔。最後出發前到河中的人工島咖啡廳嘆個下午茶，之後就返維也納還車再安排打點往捷克的行程。

三國遊終 - 阿亨湖/大鐘山

在因斯布魯克見天氣稍為轉晴，馬上決定再上雪山，不過之前先到日前蒸汽火車會去的阿亨湖，因為在火車站見到海報中的湖景十分優美，但因時間關係亦都無夾到火車班次，自己駕車上去更直接了當同慳時間。之後上到雪山天氣驟晴驟暗，不過都可以見到冰川，只可惜同想像中差得較遠，全無氣勢可言，可幸是上山的景色都唔錯。但係就駕車令人覺得十分勞氣，之前在上比較斜的路段都覺得部車力水唔夠，加速又慢；而在上雪山一役終於令人對部車絕對失望，大部份路段要用二波行，又逢車畀人過車，有部份更要一波上斜，真係幾乎想落車自己行。由於上山花費好多時間，落山後再去其他城鎮都會好夜，唔想花時間諗去邊於是就直去薩爾斯堡呢個比較熟識的地方，起碼知道邊度有得食同邊條街有乜酒店。

三國遊終 - 哈修塔特

朝早去過幾個地方先出發到哈修塔特，去到都近中午；今次唔明點解友人同友人妻都唔係咁想在此地留宿，並無諗住到步後早少少搵酒店打點好泊車同住宿，寧願畀錢泊車行一轉先再決定。於是按介紹先遊鹽坑，本來見到每人要24歐元都覺得貴，不過咁遠去到又無理由乜都唔睇，結果都玩咗近兩個鐘發現真係值回票價。之後再到市內逛一圈，本來有間聽講話有特色的教堂想去下，不過結果都無去到；而想去的下一站格拉茲又要四個鐘車程，趁友人拍照時我係咁易問下幾間酒店發現都爆滿同幾貴，不過其實佢地真係無諗過要住，所以唔再周圍搵就再出發去下一站。算數啦，反正天氣都唔好，等下次再嚟先慢慢享受呢度的美景同住下湖邊小屋。

三國遊終 - 因斯布魯克

從薩爾斯堡發車其實本想先到雪山，但天氣實在不太好，去到上山收費站的遊客中心取資料時個小姐都建議我地唔好上山，佢話以當時的情況，佢肯定上到山會乜都睇唔到。跟住本來諗住到采拉塔爾去坐一轉蒸汽火車，可惜去到又過咗最後一班火車，連火車博物館都關埋門，真係只可以講句時不與我。趕在天黑前到因斯布魯克，路旁經過見到有個雜架攤賣戶外用品及服裝都唔敢睇，結果又好彩係早走，因為在因斯布魯克都花咗一段時間搵酒店，原因係呢度的酒店幾貴，真係有錢都無理由住咁貴，就算貴亦都要貴得近景點，結果都係貴價錢但住咗間在舊城區市中心的。呢度景點更少，前一晚到的時候搵酒店都已經行經過大部份景點，知道哂位置，第二日基本上係上午經已行完，未到中午已經出車向下一站進發。

三國遊終 - 薩爾斯堡

估唔到係會在呢個地方留三晚，而且係三晚都住三間唔同的酒店。呢度基本上景點好集中，粗粗地咁行一日都行得完，而且因為之前的一日早到，在前一晚行過城區睇到有血拼的街道，到近黃昏時已經分道揚鑣，有人去購物，而個人就選擇租部單車漫遊薩爾斯堡河岸兩邊風光，直到晚飯後再住多晚先走，而第二日一早就出車到下一站。在回程時再在此停了一晚，不過只為落腳點及安排晚餐，無時間再多遊景點，不過在第二朝因為一個人單騎輕裝行動較快，早餐前先打點好行李食完就出外行下博物館及寄名信片，之後再在模型店會合友人 (估唔到咁都畀佢搵到火車店同買到配件) 再回酒店出車到下一站。

三國遊終 - 維也納

其實維也納都係一個幾大的城市，雖然有好多主要景點都好集中，但亦有好幾個想去的地方在較遠的區域，而本身大家安排的行程只在此留日半 (唔明點解友人妻未去就話唔鍾意維也納)，在第二日中午一租到車就要走，所以有好幾個地方結果都無去，本來諗住可以早少少還車再遊覽埋佢，但到最後都係無機會去，如果可以在維也納多留一日就Fit哂。結果只在第二日早上去埋熊布倫宮就去攞車出發，而且又因為攞車時遲咗兩個鐘先有人辦理手續，都無時間再去多兩個景點就要離開維也納。在回程還車時係黃昏時間先到達，所以還完車食個晚飯都無時間再行，算係此行的一個遺憾。

三國遊終 - 布達佩斯

行程第一站，坐完十一加一個鐘頭飛機在早上九點幾經已坐巴士入市區。跟旅遊指南搵到第一間酒店經已順利入住，亦順利按計劃展開行程。由於友人及友人妻疑似受腳患影響，第一日行完布達後在咖啡店悠閑咁坐咗好耐，然後回到酒店再抖抖就慢慢出去食晚飯。第二日行完佩斯，亦都因為腳患未癒又兼所有計劃好的行程都全部完成，選擇早食晚餐後進行休息。既然晚上無所事事，於是一個人出外影夜景，順路走走附近的街道，不過在回程時開始下雨，自此之後成個行程都無乜邊日好天。由於睇過介紹都唔係咁多講到匈牙利有乜其他好地方玩，第三日一早經已出發去奧地利。

天黑黑

最近在雜誌內讀到了一個故事：主人常向狗扔大小兩塊肉骨頭，狗每次總是叼小肉骨頭，主人便會哈哈大笑牠是笨狗。直到有一日貓看不過眼地問狗，難道你不知道大骨頭有更多的肉嗎？狗答道：我知道, 不過我如果叼走了大骨頭，以後主人就不會玩這個遊戲了，結果連小肉骨頭都沒有得吃。雜誌內想說的是現今的社會，反智及不按常理出牌會更能佔到便宜。
其實這一個故事在二十多年前已經在迪士尼的漫畫中看過了；當時是高菲狗被人笑每次都在一毫和伍毫中選了一毫，所不同的是他的答案：如果他選了伍毫的話，經常笑他的人便會覺得失望及不開心，被取笑而能令人快樂都不是一件壞事。雖然迪士尼到今天它已經是過份商業化的利字當頭 (嚇鬼世界其實係把鬼世界)，但在電影所帶出的信息中至少都會或多或少帶點正面或溫情。
想起的是：事隔多年，同一個故事有另一個不同的解說。我想，應該是時代進步了！
令人懷念的都是過去單純美好的世界；時代進步，天空變得更大，想看郤看不清楚。

大將之風

為了可以請得擁有大將之材的賢人來統領軍隊，原來古時諸葛先生招聘將領是會用到以下的技巧：
- 問之以是非而知其志
- 窮之以辭辯而觀其變
- 諮之以計謀而觀其識
- 告之以禍難而觀其勇
- 醉之以酒而觀其性
- 臨之以利而觀其廉
- 期之以事而觀其信
唔知通常大公司請人又會係點呢？不過，你有時間慢慢問慢慢睇就話啫，家陣請人只係靠面試問幾句任吹任講，吹得夠勁講到曉飛通常都會十拿九穩，但之後識唔識同埋做唔做又係另一回事。不過都唔關我事，反正關心的亦唔係呢啲野；學零零柒講：打打殺殺唔好煩我，我睇鹹帶好過...

婚紗背後

好耐好耐之前又有一個傳說，傳說原來傳咗好耐好耐但到最近先有解說。傳說見過兩位時裝大師對住互聯網在筆記簿上發表作品，原來其他人都疑問過只係近排先講返。傳說聽到一番鼓勵的說話感到莫明奇妙，原來大家都曾經問過點解可以咁開放。傳說聽到去留問題似是而非一頭霧水，原來另有聽講話一有呈請都變臉。傳說有人聲言要稟告朝庭，結果係被追問獨統問題為之語塞。傳說只係話想睇睇，原來係睇下邊個先睇。傳說大師無出手一段時間同都無聽到交易安排以為終於有改進，原來係早早已經關門大吉。傳說只係以為時間快，原來一早兼袋袋平安。傳說背後有更多傳說不過再傳就知邊個說所以真係不能再傳亦不能再說。

清高

讀到一個舊訪問，被訪對象是蔡瀾先生。對於他，相信會有人覺得他只是個經常講飲講食的好色鬼；又或者只是個有錢名人去做節目主持；亦會有人覺得他是個不理世俗眼光真正瀟灑的人。
個人來說對他並沒有反感，聽過有關他寫食評；有說他從來都只會付錢光顧以求寫得中肯，如果收人費用便不好意思寫得差，寫得好又難免似替人宣傳云云，不過他也加上後著說，見他是名人，食物質素及跟進得好一點這不能排除。但亦有說他曾帶記者到食肆要求收費以採訪刊登，可惜因店舖不願付錢而遭抹黑，但有朋友分析說以他的地位身分亦無須親自出面作此行為；一切此等羅生門唯有一笑置之。
不過對他訪問中提出的見解頗有認同；在他眼中，女人只有美女與八婆之分：美女不一定要樣靚，性格可愛就靚 (這令我想起天生愛情狂中相類似的見解，但算我膚淺，最好也不要醜，但現在很多人都誤解了其實說的應是"可"愛而不是"可愛")；相反，有些女仔如花似玉但性格刁蠻，聰明但懶惰，說話又沒禮貌，這些就是八婆 (現在是叫末期公主病嗎？其實不用到末期已經很討厭了，但公平的說，沒有了某些特質，你又會覺得她不像女人)。
可能有人會對他某些高談闊論十分反感﹝尤其是關於男女之間﹞，我卻懷疑評論之人是否太假道學，當然世上一定會有正人君子﹝自問我不是，但我想我真的認識一兩位﹞，但亦相信很少人沒有作出過越過了底線的思想或行為，只視乎你的底線有多高﹝若你像Laughing哥一樣當然另作別論﹞又或有否讓人知道。情況就像見到某些人聽了別人說話夾雜粗言而驚訝，又或是因自己故意說了一兩句粗言便以為語驚四座；語言本身在各民族各階層根本便有自己的習慣，個人認為說出粗言跟別人說話時夾雜外語一樣自然，若然因此而大驚小怪只會令人毛骨悚然。心想"你咪撚同我扮清高啦！"
最後，他提到父親教的做人守則：尊重人、守時、守承諾。「一個男人假如懂得尊重人、約會不遲到、說過的話又守信用，應該不會差得去邊。」男女有分別嗎？

獅子山下

在獅子山逐漸消散的環流下，旋風式咁到訪澳門一趟，一貫的行程安排中當然唔少得出車呢一個重要的環節。今次坐駕為Yamaha的二衝程引擎街車；車係舊，但除條鍊有少少鬆外表現絕對唔差，在澳門街中上斜落斜完全游刃有餘。呢位朋友擁有咁多部車唯一美中不足都只係澳門道路太少，走到最遠去到黑沙都只係十幾公里，未能盡興；幸好上月終於可以安排畀佢全走新界百幾公里過足遊車河之樂趣，總算等在下可以回報返佢每次遊澳都咁招呼周到。
原來今次安排同兩年前都係一樣，同樣係先遊車河再傾旅遊大計；所唔同的只係自駕行程改為路環黑沙，下午亦都係在東亞大學飲住咖啡傾，晚飯都係氹仔，最後在南灣大馬路食埋糖水。唔明的是今次逗留的時間其實同上次差唔多，但係行程就好似好緊湊，唔通我地手腳越來越慢？咁去旅行時真係要爽手爽腳唔係咁多景點真係可能去唔哂。

猛將

從第一滴血到一滴血都唔使流，可見巨星之路的確係好好走。其實睇得電影都知道主角永遠都係打不死，正如現實世界的遊戲有部份人係永遠都唔會中槍一樣；見怪不怪真係唔好同佢拗咁多。故事情節方面我好相信在真實世界中亦都會有更多比戲內更唔合理同更出人意表的事發生，見到件件老餅幾廿歲都走上走落擒高撻低你重想點？比起人地成套戲由頭解釋到尾都講你唔明點解會有夢中夢中夢中夢....呢套會唔會比較易接受呢。平時經常見到好多專業人士都聲威響震天，大家都力讚佢地幾咁叻幾咁勁真係堪稱猛將高手，可能工作行內太多人享負盛名，到真正有幸交手合作時就發現... "噓，猛將喎~ 高手喎~"。 所以轉頭諗返，搞咁多電腦特技不如睇下幾位阿叔打下拳頭交似乎重實在一啲。令人回想的一節係，到底係唔係救返一個無辜的人就可以抵償過往殺戳的罪孽，可以成為下半生的救贖？定係只係作為心靈上對自己的安慰？佛家說：放下屠刀，立地成佛；放下的一刻，我諗應該係完全的覺悟。

反斗奇兵

友人話睇兩次都覺得咁好睇，又話哂係大結局咁，結果終於走去睇；點知碰啱星期二有特價又重送埋3D立體眼鏡真係抵。
想當年第一集的時候係同同事一齊去睇，當時諗住係卡通片同預咗佢係細路仔戲，都無乜野期望；點知睇落又幾好睇，同到最後吹熄支火柴時真係忍唔住笑咗出嚟。 (諗返呢位同事佢後來知道我好鍾意唔鍾意走去鍾意隻彈弓狗之後重買隻嚟送畀我，真係多謝哂！雖然呢位朋友好多時都係講下就算，但佢都算幾有心同埋有偈傾，再多謝多一次。)
而呢一集睇完亦都覺得好好睇同幾感人，友人講得啱，真係唔係畀細路仔睇。迪士尼即係迪士尼，賺你錢之餘都會諗過度過計算好笑喊位過你。好似有一年過年同朋友去睇超能先生，結果都係意外地好睇過預期。我個人就鍾意呢類溫情片好過史力加之類咁多含意的卡通片，講咁深做乜啫？！

無語問蒼天

天有不測之風雲，意外事件日日有之；當然經歷長時間心理折磨的確十分難受，再犧牲於一個笑話之中更令加人氣憤難平；只係眼見耳聞近日大肆報導，眾人突然覺悟前非，條條網路都理直氣壯，句句留言都叫人珍惜。點解人硬係要見到苦難殤亡先至牽動到惻隱之心？有見到人話珍惜所有，有人話唔好再咁多抱怨；我相信到明日一樣會見利忘義，一樣會諸多說話事事挑剔；唯一唔會變的應該係會繼續指指點點話人呢樣唔啱嗰樣做錯。
想起一句電影入面叫人先擔心在生的人的對白，同樣道理係你大大聲話畀人知你幾咁痛心哀悼死難者同幾咁可憐佢地，但係你又有無真真正正咁用心去對待同尊重你身邊的人？學韋小寶講教主同皇上唔係掛在口邊講而係放在心中敬重的。
人有霎時之禍福，意外就係意料之外；控制唔到的事無謂擔心咁多亦不用求神問卜。自己控制到的事唔該問心先好講同做，公唔公平過唔過份有無厚此薄彼講一套做一套我諗唔使問人先知掛。正如叫得人唔好食魚翅就唔該唔好走去話要食鵝肝。

非誠勿擾

八月十五日是日本戰敗投降紀念日，每年在這一日子前後都會有獻花活動紀念當年為抗日而犧牲的人士；無論是勝是敗，所作出的努力、付出、犧牲等，都得到後人的尊重及認同；不過在儀式中，最好顧及當時的場合氣氛，別人才會感到那份誠意。經歷過戰爭的如是，但並非為戰事而犧牲的又如何？
想起了同日舉行的全國哀悼日，各個單位勞師動眾全民默哀所有機關下半旗；待遇是一樣了，但同樣的動員能力是否應該用來做好防災措施、嚴打豆腐渣、治理水土流失等？不是不讚成哀悼，只是如果哀悼後過幾年同樣的災情又再發生的話，國旗再降到地面上都沒有意義。國事如此，日常工作又如何？
再想起了每天面對的人和事，首要關心的都是服式配搭、蜚短流長，公事忙不如無事忙；無論如何努力付出多少時間精力心血腦筋，做得好的不會有半點謝意反而更諸多挑剔為難問題多多，有事先找碴問錯，總沒有先想解決方法。不過再想，多謝及問候等還是可免則免，惺惺作態反而更不對胃口；正所謂非誠勿擾，不如出少句聲當幫忙。
提到非誠勿擾，總是有奇怪的感覺；誇張但卻寫實，堆砌而又有部份認同；要打分的話肯定不會高；倒是當知道其中的歌曲是知床旅情時才感到其中的無奈，然而結局卻又並非如此，最中聽的還是那句交心不交命的酒友。

小白獅

閒在家中無聊睇電視，播影的是卡通片小白獅，日文的本來名字是『森林大帝•勇氣改變未來』
雖然未睇完經已要出外，好彩都睇到最重要的一段；原來森林大帝要肩負的唔止係作戰。令我想起了另一套有關一隻咒術熊的漫畫，其實內容都好單薄同牽強，只係入面一段講及有型的男人重留有印象。估唔到睇漫畫卡通片都要好似讀書咁互相參考先可以融會貫通，真正咁學到野。
俺はたたかうよ！

口不對心你至勁...

今次呢舖係一個累全家！唉，講口不對心，原來真係未到家。雖然未至於冚家鏟，但就總之係陀衰家，就咁就一個累全家。
借用托爾斯泰的名言"幸福的家庭總是相似的，不幸的家庭各有各的不幸"；幸福的可以少做少錯，唔做自然無錯。不幸的就會發現越來越多五花八門的事件發生，唔係衰呢樣就係煩嗰樣；其實真係好多都係小事，不過要化大，自然有佢的辦法。
不過，個人自然有個人的責任。之前在某個場合，學到一句"緊守崗位"，驀然發現原來作為一位好丈夫、好爸爸的條件其實好簡單，但最簡單的事情往往又唔係個個都做得到。工作上何嘗唔係一樣，原來真正的緊守崗位唔單止要盡忠職守，更加重要係唔好畫蛇添足，你手多多畫多隻腳無論係幾咁想做好心結果多數都只會係做壞事，你口多多講多句唔到你講的說話無論係幾咁有理據都只會係講多錯多。

其實好明白，做牛做馬的，為食，總要低頭。

p.s.1 緊守崗位，陳先生、鍾先生，你兩位都經已做到！
p.s.2 理論上呢個blog應該係無觀眾，但真係好想對大家講：好感激你地無怪責我一個累全家。

四大美人

十年樹木，百年樹人；屈指一算，在呢間公司經已度過咗11年的歲月，忽然間想記錄下人。是否美人只係見仁見智，一切只以個人對其性格及感覺作準。而選四大，只因為有時想起呢四位時總不其然在心中仍有牽絆。
一個係做事總力求四平八穩的人；不過事事只求平穩難免墨守成規，如果一路堅持落去的話，恐怕將來的期望只會變成失望。不過，有時到底係佢計算得太準確，定係佢真係有棋差一著，我真係唔知。如果佢真係咁醒，咁我真係諗得多餘咗。
一個係志在四方的人；可惜似乎佢鍾情的方向係一個錯誤的選擇。老朽絕對可以以身為鑑，一個最成功的失敗者無論點都只會係一個失敗的人。唯有寄望佢早日找對方向。
一個係可以義交四海的人；但係唔知點解，明明事實證明到佢係可以獨當一面的材料，但有時仍然會出現信心的問題；無論係邊一方面都好，如果永遠都以絲蘿自居，到最後除咗自己外更會令同儕失望。
一個係可以用一謙四益嚟形容的人；小妮子年紀輕輕但謙遜有加、做事不慍不火、膽識過人。在此祝願佢可以不忘初衷，以佢的為人處世，我覺得佢會係四位之中眼界最廣闊的一個。
當然，正所謂"各行各路 各安天命"，佢地的將來其實唔關我事，不過如果有眼得見佢地心願達成，都會有少少感到老懷安慰。

過橋咪跣

每次揸電單車過青馬大橋都感受到凜冽的海風夾雜住海水的氣味迎面吹來，透過路邊只得幾條鋼線的圍欄可以清楚咁望到大海同船在下面通過，感覺上好似飛越海面一樣 ── 爽！而且跟住飛條北大嶼山公路又可以放肆扭盡油門，極速飛馳；話極速其實都只係百一多少少，人老咗知道樣樣行得咁快會好快到盡頭，都係慢慢行好，所以馬力細的車真係啱啱好。
不過，最緊要都係過橋時唔好遇到強勁的側風，好似噚日在單人匹馬的情況下試過差少少吹到跣去隔離行車線；不過當有時巴士同大貨車在身邊駛過時，擋一擋風嗰兩下離心的感覺又真係好刺激。好在回程時通常都有波友幫忙增加重量，可以悠悠閒咁欣賞夜晚過橋時兩邊的燈光同埋月亮掛在橋架頂的景色；如果有個車殼包住，邊有咁廣闊的視野呀？！

遙遠的祝福

的確，原來人生是有無數的緣起緣滅、人聚人散。
看透了；喜的，自不用錦上添花；悲的，只能默默送上祝福。去年的場合，友人由衷說的"珍惜眼前人"，至今依然未能忘懷。 再拾人牙慧，沒有人知道將來會怎樣，但生活還是要繼續。
如果說一切都是天意 一切都是命運 誰也逃不離... 如果真有上蒼，就讓在遠方及就在身邊的人都有耀眼的未來及燦爛的明天。

雪櫃

偶然打開雪櫃，想起了很久以前網路上流行過的一個智力問題，大意是問將長頸鹿放入雪櫃中的步驟；答案簡單得很，先打開門，放入長頸鹿，關上雪櫃門。
接著有第二個問題，將大象放入雪櫃的步驟；答案是... 打開門，先要把長頸鹿拿出來，才能放進大象。
把長頸鹿拿出來這一步驟，原來很不容易。不過這問題並不是每一個人都覺得困難的，可能只是自己比較笨了吧。有人可以很快，更簡單的是不要把動物看得那麼大，那雪櫃內可以同時放的會更多。
笨可能改不了，同樣的問題總是要花很長的時間去解決。但總相信如果是有了目的，故意去做什麼了，那是假的，沒有意思；煉歷得到的體驗才會深刻，傷痛換來的教訓才有意義，因為人不付出犠牲就無法得到收穫。

高返

以為經歷過一段漫長的旅程，想要寫的會很多。經過了高原反應、見過了崇山峻嶺、體驗過險象橫生，想要寫的原來只有幾句。

人生到處知何似　應似飛鴻踏雪泥

泥上偶然留指爪　鴻飛那復計東西

老僧已死成新塔　壞壁無由見舊題

往日崎嶇還記否　路長人困蹇驢嘶

賽龍奪錦

苦練兩個半月(其實都唔算係苦練，當做下運動啫)，終於完成比賽，爭唔爭到獎唔緊要，最緊要玩得開心。以我呢類樣樣都唔係咁掂的人來講，有人畀我一齊玩，只要唔好陀衰人都算係咁囉。
突然諗起唱K，在廿幾年前唱K剛到香港的時候，大家想去唱又唔係好敢唱，係得我呢D咁唔要面的人隻隻歌都唔放過由頭唱到落尾，直到大家見呢條友仔唱得咁難聽都夠膽唱，先至頂唔順出嚟大顯身手。好多年之後，個個都願唱，自己亦開始識得唔好獻醜，開始唔再去唱K；直至一位朋友話 "大家玩下之嘛？個個都係歌星咩！"
又係喎，從來我做乜都係半桶水咁玩，點解唔醒起呢個道理呢？我有打波踢波，唔通又要係有球星咁叻咩？大家落得場就有平等機會去玩，入得K房亦都有權去點歌。總之無論係乜都好，夠膽有勇氣去試我唔覺得係錯，只要我無犯規打茅波旁門左道呃神騙鬼就得啦。
自己知自己事，得獎你估真係話咁易咩；奪錦無望，但係總算我有攞勇氣出嚟落過場。

為地球打氣

想起了一個很久以前在日劇中的故事：

在市郊地區的一個公園內，有人發現了一個很大的地洞，沒有人知道它是何時出現及如何形成。有一天，有人為了測試洞到底有多深，便拋了一個網球進去，但一直都沒有聽到聲音；跟著便都沒有人理會這一個洞。為了方便的原故，公園內的人們都隨手把垃圾掉進去；清理垃圾的工人發現了後，索性將在其它地方收集到的垃圾都傾倒在這洞內，節省了運送到處理工場的時間。

慢慢地，市政府、縣政府都發現了這一個洞；而由於這洞看來似乎無論傾倒多少東西進去都填不滿，正好解決了一向以來為處理垃圾而帶出的問題及財政負擔。四方八面的垃圾都開始運來了這裡傾倒，而這洞亦都永遠只是漆黑一片、深不見底。

到最後，國家政府及其他國家都注意到這樣的一個洞；經過國際間的協議及安排，倒進洞內的還包括各國的有毒廢料、化學廢料、核子廢料等。

有一天，市中心的上空掉下了一個網球.....

一齊

耗費咗一大堆塑膠木材紙張時間金錢汗水的宣傳活動，真係會令地球捱多幾年？只係熄燈一粒鐘就會緩和氣候變化？只是踩幾個鐘單車同磨斷幾條鋼線大家就會珍惜資源？
當然，唔嘥野個社會係唔會有進步。用幾十萬去宣傳叫人熄燈慳幾毫子電，最理想梗係大家一睇就明白問題的嚴重性同個個都去做；但如果只係幾個人間中熄一熄燈係唔會令電力公司可以熄一個發電機組，煤結果都係燒咁多。
在一個小區派幾個杯墊同叫粒星仔講幾句亦都係想大家知道唔錫住用就好快乜都無哂，希望市民同傳媒講幾講又會多幾個人識得慳。可惜，件事唔同咗，承諾無咗，訊息薄弱咗，大家明日唔記得咗之後資源都係嘥咁多。
結果，又係要返去總和力的問題。一齊，其實諗落同爬龍舟一樣，廿幾人一條船，邊個出力邊個揸流攤畀你坐在船上面都好難知，就算佢唔出力大家都會睇到條船有郁，你真係吹佢唔漲兼奈佢唔何。
一齊丫唔該！