無語問蒼天

天有不測之風雲，意外事件日日有之；當然經歷長時間心理折磨的確十分難受，再犧牲於一個笑話之中更令加人氣憤難平；只係眼見耳聞近日大肆報導，眾人突然覺悟前非，條條網路都理直氣壯，句句留言都叫人珍惜。點解人硬係要見到苦難殤亡先至牽動到惻隱之心？有見到人話珍惜所有，有人話唔好再咁多抱怨；我相信到明日一樣會見利忘義，一樣會諸多說話事事挑剔；唯一唔會變的應該係會繼續指指點點話人呢樣唔啱嗰樣做錯。
想起一句電影入面叫人先擔心在生的人的對白，同樣道理係你大大聲話畀人知你幾咁痛心哀悼死難者同幾咁可憐佢地，但係你又有無真真正正咁用心去對待同尊重你身邊的人？學韋小寶講教主同皇上唔係掛在口邊講而係放在心中敬重的。
人有霎時之禍福，意外就係意料之外；控制唔到的事無謂擔心咁多亦不用求神問卜。自己控制到的事唔該問心先好講同做，公唔公平過唔過份有無厚此薄彼講一套做一套我諗唔使問人先知掛。正如叫得人唔好食魚翅就唔該唔好走去話要食鵝肝。