浴火之旅 - 鳳翼天翔

眼見鳳凰全無看頭自然悠閑走走無謂花費精神，反正都係處處景點入親都要收費，而其他地方又棚架滿佈，真係搵地方坐低Hea下好過再出去畀人呃。點知晚上返到旅館畀老闆娘咬住唔放抱怨我地無聽佢講參加苗寨團，咁樣玩絕對係旅遊方式不對玩得完會不到位。大嬸，我對你地每日有上刀梯表演的原生態真係無興趣喎，唔係因為你有個暖爐在枱底，而上房開空調你又收我錢，我真係唔會坐低啦；加埋見到你地咁大刀闊斧地大興土木，計我房錢又有意無意出埋發聲計數機加收我廿蚊，不禁又火從中來。最後一日我地都係盡早離開，一來無謂眼怨二來亦可以早點去到張家界市可以隨時殺入機場點都唔會誤點。以為一定坐到飛機就真係可以順利展翅飛翔點知到最後都係逃唔過詛咒的巨網，同行友人忽然遭受病魔侵襲幾乎真係上唔到機；今次鳳凰之旅有驚有險返到嚟但其實只係鎩羽而歸。