戥豬石

原來伴郎兄弟又有個稱謂係叫戥豬石，呢下野數落都做咗好多次，搵得你做自然有咁上下交情所以從來都未托過手踭。都好明白責任就係有乜頂乜一眼關七，目的只係想主人家開開心心專心成親。
原來麻雀館有個職位叫戥腳，只要一有唔夠腳的情況就會落場開局，佢地做又卅六唔做又卅六因為無論贏輸都歸公司數。工作好簡單就係要麻雀打得成等是但一個有胡食，皆因公司只從中抽水賺錢所以絕對唔會理你係唔係猛將高手。
原來汽車輪胎唔平衡時要去戥胎，所用的材料係可以貼上車呤上面的鉛塊。理論好簡單，要車轆轉得暢順就要重量平均，所以見佢邊一邊唔夠的話就將佢放响邊。當然，戥與唔戥，個轆依然會轉部車一樣會行。
原來一個機..... 吓？！係戥穿石唔係戥豬石？係豬，點會唔知係豬。