退役

今次係到陳校長的文章，佢提到wargame可以訓練領導才能、團隊精神同個人警覺性等等。個人來講，其實都只係志在玩下同打晒所有子彈發洩下咁啫；打完開開心心講下笑下咪幾好，唔使好似佢咁講到咁嚴重同認真。但係佢講到話要誠實呢樣又的確係好重要，如果唔係我都唔會打到唔想打。家陣在場內要面對的 hardware 真係好 hard，係艱難辛苦個 hard。以前就話大家鬥快衝前去霸佔有利位置，現在係人地的火力勁到唔使走上前都打得到你；咁都唔緊要，走到位識避都重有得玩，但係個個都係鐵人打極唔死就真係無得玩！

有時真係唔明白，點解成日都見到個個人都咁怕輸？有細路打機唔想輸搞到喊晒口，有人分手互相指責沒完沒了唔認輸，打wargame中彈唔死唔肯輸不在話下，打波有foul唔認foul兼射波唔入又話人地有foul亦都係唔肯輸，明明間公司細到爭完都無得你上位但都係要阿諛奉承驚輸蝕畀人，仲有係搭車搭地鐵爭先恐後上車爭位坐落車爭出閘下下用身位頂住怕遲咗會執輸，就連平時傾偈講普通野都要鬥快鬥叻唔肯輸... 唔明，誠實同認輸真係咁難？

香港人最奇怪係在無得唔認輸的時候會講得出好似 "今次係輸運唔係輸人"、 "輸人唔輸陣"、"輸陣唔輸精神" 咁樣的怪道理。贏多次或者輸多次到底有幾緊要？個個贏咁始終都會有個輸。最慘係...野戰，都可以話退役唔玩；做人，無得唔玩架喎。

其實... 如果次次都贏，咁邊度好玩架？

AVATAR

兩個幾鐘頭的3D版盛惠一百三十大元其實都算抵睇，聖誕節無理由唔乘機賺你一筆。睇到後來我以為係廸士尼的出品，不過對於我來講都無乜分別，就算你係幾出名的大導演，我都唔會識得睇你部戲有乜咁特別同有邊個場境咁值回票價。無論個故事幾咁複雜，個男主角句對白大大聲話 "...they can't take whatever they want..." 咁重唔係叫人珍惜資源？即係用環保做主題啦，呢類大有主題又大場面兼連場特技，我諗都不外乎係想攞下獎咁啫。不過佢入面都講要尊重生命、尊重大自然呢樣野我個人都好認同，事關只係尊重人呢下野我在平時的日常生活中就好少睇得到... 都係同自己講句... 算把啦。

根

新聞報導話今次的氣候會議無乜實質結果，講到底都係唔係個個都有心去要保護呢個地球。當然，大家唔使為地球擔心，大自然唔會咁容易死，死先的都只會係我地呢種唔珍惜環境的人類。就好似人類為要建屋開路而造的護土牆，本來建成後只係一道了無生氣的冰冷石牆，但只要有一粒種子、一道裂縫，大自然都可以找到生存的空間，數十年來整道牆亦都被連綿的氣根美化了。如果人真係識諗，就畀周圍可以多一點有生氣的根，好過開埋晒乜野哥本哈根。不過大家都唔使咁緊張，再過多幾十年到大部份人熱到死晒之後，到時唔使再消耗咁多資源時，地球一定會又再靚返晒。

傻瓜

最近讀到了兩篇有關傻瓜的文章，一篇是季羡林大師之作，另一篇出自芥川龍之介手筆。

季老文中提到把身邊所有人都當作是傻瓜而加以利用或佔便宜的人其實自己才是個傻瓜，因為到最終一定會有人知其居心而發現其非云云。可是此一隱含有善惡到頭終有服的說法並未能令在下信服，原因本人從來不相信善有善報此類的因果之說，見現今世界惡人當道已足見此說並不可信。

而芥川先先之傻瓜學說，則頗能令在下產生同感。此一說法提及一個傻瓜會相對地覺得身邊所有其他人通通是傻瓜，原因為其他人的所想所為與他自己大相逕庭，所以他只會想是別人傻而不會明白其實其他人才是正常的一群。以此一理論套進自己身邊一看，發現原來這剛好解釋了為什麼常常總是覺得身旁的人都不似以應當的方法及態度去做事... 原來... 傻瓜是我！

傳說

响好耐好耐之前有一個傳說. 傳說傳說咗好耐好耐. 傳說一路只係傳而無人說. 傳說有人可以為咗方便做野自己求其決定就唔理人死活? 傳說有時連方向都未決定就叫人開工? 傳說係可以明知嘥錢都可以話做就做? 傳說有人話一日之計在於晨? 傳說有時真係唔使識只要叫人做? 傳說以前會有而而家都要有人幫手做野? 傳說明明話有人講過阿邊個但又可以話無講過? 傳說話剛剛叫人講但好快又話人講都多餘? 傳說有人成日話多野做又亦都早早收工? 傳說有人話好忙好忙又辦工時間走去做私人野? 傳說有人會覺得無事重會好支持? 傳說有人會可以為私人理由自己決定話畀就畀? 傳說明知道有問題但好快又卸咗去? 傳說明明係知道又會話無聽過? 傳說得咁誇張會唔會死得好快? 傳說話如果樣樣野都咁易畀人睇得出會好蝕底? 傳說都相信只係中咗憤世嫉俗之毒? 傳說其實都只係一種現象就好似大廈外場反光但唔係個個都睇到?

新駒

終於, 舊的電單車功成身退. 經過三年的東奔西走, 經已開始力不從心, 經過長途突然收慢或天氣太熱的時候, 會感覺到引擎不勝負荷而轉速下降, 如未能及時加大油門的話就會馬上死火. 雖然現在已是寒冷冬季, 但為免終有一天在街上突然死亡, 趁早換車實在在所難免.
之前有鑑於慣用的車行似有蠱惑, 曾有偷油之嫌並於維修時常有錯漏, 今次特別轉為幫襯另一車行. 可惜, 天下烏丫一樣黑, 去到邊度都總會有人會用某種方法去屈返你幾舊水. 唯有寄望佢維修保養工夫上無錯漏, 駕車出街可以安安樂樂.
今次換的名叫大鷹王, 二手車都算係咁, 車殼會有裂痕及有碰撞過通常都不能幸免, 到今時今日台灣車都算係可靠耐用, 希望呢部車可以行到起碼三五年, 唔使又再換車咁破費.
不過... 上手車主成部車係咁貼車仔的貼紙, 前前後後撕完但都重有一張在車頭膠片撕唔走, 就係咁就無辜做咗車仔粉絲...

貓香世代

友人店舖內新加盟的三隻貓.
之前的阿旺經已乘鶴西去, 但據聞係西去左東涌, 現在經已係一寺的護法, 有時都真係會諗下呢d咁玄妙的故事到底係唔係真有其事. 不過三隻貓一去到舖頭就都識得自己上閣樓玩同自己走返入籠度開餐, 去到門口又會自己走返入舖, 唔知呢件又算唔算係玄妙的事?
不過其實好多時去到友人的舖都會學到唔同的知識, 因為好多時都有佢其他的朋友到訪, 傾談間又會知道d新野, 所以出開車, 都不忘會去坐返十幾二十分鐘... 真係打搞晒.

禮失

早前參加了客戶的工作坊，經過去年的經驗，大概因為了解了此項目的重要性，參加的情況又與上次的不同。不過"廚房係忙的時候，早落order同遲落order都無分別！"
這次的主辦單位是友台總部的同事，主持人最初表示大家要以一個大同及輕鬆的態度來參與，但其實他表現出來卻有點嚴肅，安排上也不見得開明；也許是文化差異吧。但令人不禁汗顏的卻是參與者亦沒能讓人感受到我國為禮儀之邦，雖說是公事所需但亦應有參與的適當態度，縱然各位都只抱著過客的心態，唯與人共處也該維持一分尊重。
其實每逢有此一類的活動或開會的時候，都有機會看得見眾生的不同反應及言行，想到的是"如果沒有包容的氣度，就乾脆別討論了。"

正苦

近日好多人談論政府的施政, 講到尾真正受苦又咪係我地呢D小市民. 我都知道政府難做, 但係難都唔該畀少少心機去做丫, 家下做到你就"正", 我就苦. 真係唔識講, 不如睇下我朋友點講:

點解我交稅出糧俾視民望如浮雲自以為可以代表我而唔理我死活既特首? 點解我交稅出糧俾班乜都唔知淨係係道"鬥噏"既高官同議員? 點解我交稅出糧俾咩都無做過但係又廿幾萬月薪既政治助理? 點解我交稅用黎幫一班自己父母老師都唔理既學生驗毒? 點解我交稅用黎俾D可以話唔想票控就唔駛票控煙民既公務員? 點解? 我唔同父母同住(但家用照俾), 少六萬免稅額, 仲要交多咗租, 無物業, 無差嚮減免, 無小朋友, 無子女免稅額, 從來無申請書簿津貼, 讀書無Grant無Loan, 政府無8萬5, 無首次置業俾我, 我唔夠資格申請公屋居屋, 高地價政策又益晒D發展商地產商同大陸炒家, 我無綜援, MPF又逼我攞D錢俾D Fund佬賭, 08年輸咗一半, 我淨係可以打吓個室外籃球場, 得幾舊水電費減免, 一百蚊慳電膽, 減我少少稅但係又減埋我既免稅額; 同特首講話D樓太貴, 我買唔起, 佢反問返我點解唔住遠D, 喂大佬, 住遠D唔駛錢搭車, 唔駛時間呀; 同佢講失業問題嚴重, 佢又反話有心實搵到工, 你個仔做唔到醫生你叫佢做快餐店吖, 你未只不過係以財政司信箋致函向醫務委員會施壓要求豁免長子的執業試囉, 特首!

因果

因

緣

果

一次未能完成的單車旅程，未能完成是因為體能問題而令到不能到達原定的目的地；雖然上次隊友仍說歡迎再次參加，但亦不想每次都成為別人的負累，因此知道有需要多加鍛練。

加上讀過了友人借閱的書本，當然知道此生亦不會有去環遊世界的機會和膽識，但亦想有機會體驗一下以單車漫遊的滋味。當然最重要是可以跟得上大隊。

結果，從旺角將單車開到了荃灣，希望這一次會有恒心不時去用它來跑一次，好好鍛練一下。

老年十忌

讀過季羨林老師的《真話能走多遠》，以老師來稱呼是因為從他的文章中知道他的確是一位受敬重的老師，而不是眾人所稱的國寶、國學大師等。原來他自己不斷的說要辭去國寶這稱號並不是謙虛，而且他的研究範疇亦不算是國學。能學到的其實不只這些，這次更可以從一個年紀是自己一倍以上的前輩學到了他的待人及處世之道、讀到了他的閱歷。
其中一篇的題目是老年十忌，一讀之後發現原來自己經已犯了十之八九，故此特意將此十忌抄錄下來以警惕自己。
一忌：說話太多
二忌：倚老賣老
三忌：思想僵化
四忌：不服老
五忌：無所事事
六忌：提當年勇
七忌：自我封閉
八忌：歎老嗟貧
九忌：老到想死
十忌：憤世嫉俗
他也寫到：「我說過不少謊話，因為非此不能生存。但是我還是敢於講真話的，我的真話總是大大地超過謊話。因此我是一個好人。」原來，要做好人不難，只是時勢之言難免。畢竟除了生存，有時亦是真話難求，只能再拾季老另一牙慧「當時只道是尋常」。

中華五千年

適逄國慶六十週年, 參與了一個萬人大巡遊. 其實話參加都只係要幫人去影下相, 拍下錄像. 其實話幫人亦只係對方團隊影影下無人再去影至搞到要搵個唔識影的人去影.
短短兩公里的路程話咁快就行完, 不過要拎住部機行在最前掉返轉頭影就的確係好難, 向住前面行又要拗返身望後面又會對唔準目標, 倒後行又睇唔到路分分鐘仆街兼要不時望前望後, 結果影到全程都係以手搖鏡效果拍攝.
就咁樣倒行逆施走完兩公里, 其實同我國國民走完呢六十年無乜分別, 亦諗起中華民族呢五千年何嘗唔係不斷在前進及倒退之中停滯不前. 兩公里輕輕鬆鬆就走過, 百花齊放大躍進開放改革就一世都行唔完, 先讓一小部份人富起來的確係我地偉大領導人的睿智, 不過原來在人民富起來之前只係為官的那部份人富起來, 只係靠關係的那部份人富起來. 名作家的確係講得啱: 社會主義下人人平等, 只係有某部份人比其他人更加平等!
以為新中國係咁? 之前的幾千年亦唔見得好得幾多, 中國人的路似乎走得比其他人更崎嶇. 河殤入面問到: 到底係苦難選擇了中國人, 定係中國人選擇了苦難? 隋唐盛世之後就故步自封, 從來都無想過走出去見識世界, 增廣見聞. 見到技不如人又話要超英趕美, 總唔會反省下點解自己差過人地. 唔通真係民族性的問題?
雖然我覺得柏楊先生有少少夜郎自大, 講來講去三幅被. 但中國人醜陋的一面又真係畀佢講得幾中, 兼且我地大家日日都見到唔少. 中國人永遠口不對心, 見到高層就阿諛奉承, 有威實要自己攞, 有鑊就卸畀其他人, 師父授徒永遠留低最後一招, 口講團結實在係你死你事.
點解, 點解?

做乜諗

覆述自朋友口中, 原來多年前一位認識的人講過句咁樣的說話.
「你諗咁多做乜丫, 一世人入面你都會做出好多個錯誤的決定啦, 你而家諗咁多都唔代表最後個決定係啱架喎, 想做咪做左先算囉.」
有無道理唔緊要, 我就覺得佢幾啱聽.

陽光下的130km

以為自己可以應付到的單車旅程, 結果令自己深深體會到 "無咁大個頭唔好戴咁大頂帽" 的硬道理.
早一日經已先從香港到澳門朋友家過夜, 免卻要一早起身舟車勞頓, 諗住會有好狀態去展開旅程. 翌日一早, 七時許出門, 與同行隊友共享早餐並且先認識認識. 同行人士原來個個都起碼有十年單車遊經驗, 心諗跟實六位前輩就無走雞, 呢個時候都重以為自己可以輕輕鬆鬆跟人幾個鐘就到目的地. 其實, 不自量力都經已係死罪! 當然, 六位前輩睇住, 無咁易會死, 但死罪可免, 活罪難饒...
正式行程由拱北關閘開始, 坐上單車背住朝陽直往西面的台山進發. 首先發現的問題係, 點解踩左近十分鐘都係在四線行車的公路旁邊行進? 大貨車同巴士就在身邊擦身而過. 開始明白原來行程中大部分的路段都在國道進行... 問題開始越來越多... 國道, 係指修整得比較好的大馬路, 唔係高速公路, 所以間唔中就有十字路口同分叉路, 每次轉路線都要 cut 三至四條行車線; 而國內人駕車絕不手軟, 好在跟住六位前輩, 都可以趁機在車縫中穿過.
問題又來了... 隨住身前影子慢慢縮短, 猛烈的太陽開始發揮出無窮熱力, 車速表的溫度計顯示出四十度的高溫, 汗水如同失禁一樣源源不絕湧出. 再有問題係朋友明明話我練車時有大約廿幾公里的車速應該可以跟得上大隊, 但踩盡到廿七八公里都遠遠落後. 出汗加上出力, 呢次都睇怕實中暑身亡.
踩左三個鐘到神灣第二次小休, 原來經已改左路程由去台山變去中山, 由於太陽去到頭頂, 轉左方向都唔知... 隊友話係天氣太熱唔想踩咁遠, 其實係我太慢侷改至真. 接住的兩個鐘又發現有問題, 單車個坐位實在太硬, 屁股開始感到痛楚, 友人告之原來單車褲係有加厚坐墊的, 加上唔習慣坐單車seat位, 所以我會覺得特別痛.
在個人莫晒的時候好彩剛到午飯的餐館, 坐足個幾鐘又灌足湯水, 真係有起死回生的感覺. 可惜一坐上車屁股的痛楚馬上返來, 好在再踩多一個鐘就到目的地 - 中山大涌鎮. 馬上入住酒店沖涼小休再去飲下午茶, 終於可以悠閑一陣. 晚飯於鎮內大酒店, 並無驚喜, 全日總共行左76公里, 比原定少左足足三十公里.
第二朝八點幾起身食早餐跟住又再上路, 來的時候兜左個大圈, 回程只要直接南下. 無錯係體力經已恢復, 但seat位帶來的痛楚有增無減, 呢個都應該算係不自量力的懲罰. 最後回到澳門睇表總共行左130公里, 同原本計劃要行的少左一大折, 咁多人就我一個真係唔好意思. 但亦令我再一次感到澳門人比起香港人真係親切隨和好多, 又無香港人咁囂張. 不過, 下次唔該唔好又借一架硬坐車.

老掉重彈

還是學生的時候，曾經拿起過兄長的結他彈過了幾個月。當然，事事都只會抱著無線新聞精神的我，無論任何事情都"是是但但"的便混過去了，絕對不會有毅力及恒心去造出任何成績。縱有任何看似稍為較別人優勝之所謂長處，實質亦只屬屠龍之技，不值一哂。(當然以無線新聞來比喻只為笑話一個，個人相信每一個新聞從業員都絕對會以專業的態度和精神去處理所有採訪和報導 (某些報刊除外)，絕不能以偏概全的以個別個案去妄下批評)
二十多年後嘗試將結他再次拿起，結果連多年以前僅能掌握的幾個和弦亦完全遺忘，對書試了多遍亦未能成功。當然，人老掉以後的反應及手指的靈活性亦會大大減低，應付不來絕對是意料中事。而且以個人的性格，相信最多只會抱琴數週，之後又會將它放下荒廢。
多年以來，能夠保持住的興趣或嗜好數來數去亦只有駕電單車一項。雖然曾試過幾次意外事故而想過不再駕電單車，但相隔數周或最長數月之後，又會淡忘"炒車"陰影，再一次追逐日曬雨淋、冬冷夏炎之樂趣。難以釋懷的只是曾有試過因醉駕或判斷問題而讓坐便車的朋友抛到地上，幸好兩次都只是慢滾落地而沒有受傷，而事件之後友人卻仍甘冒亡命之險再向死神挑戰。(謹此向過往眾多男女死士致意)

賤民、貧民

今日有幸到高尚豪宅的會所一遊, 粗略咁見識到豪宅的氣派. 在政府的體育館內可以劃到一個籃球場的面積內只劃有一個羽毛球場, 匿大的空間真係會令你感到心曠神怡, 而且裝修亦都美倫美奐, 設備齊全... 總之一句講晒, 有錢真係好.
不過我地呢類屋村出身的都係唔好諗, 正所謂無咁大個頭唔好戴咁大頂帽, 住唔起之餘亦都受唔起. 以前都有朋友提點過, 我地只屬於賤民, 唔好話高攀唔起, 若然個豪宅重有個威猛的名稱 (例如君臨天下或者擎天半島咁), 真係分分鐘行過樓下都會受唔起流鼻血, 更加唔好諗話想入去住下.
夜晚食飽飯無所事事, 亦唔知做乜抽起條筋, 一開車迎面吹來陣陣涼風令我突然想跑一轉山路. 漫無目的咁一出路口左轉上青山道, 隨意咁又鏟左上華景山莊, 途中忽然被一條由路燈劃出的西區海岸線所吸引, 而近岸的一邊亦見到美孚旁邊的高速公路劃出左另一條燈光大道, 再望遠少少重見到世界聞名的維港夜景, 原來呢度都有個咁靚的夜景, 果然不失為另一個高尚豪宅區.
望下望下, 諗下諗下, 雖然我係住唔起, 但要享受呢d靚景都可以行多幾步, 打波打唔起大場亦都可以去個細場係咁易玩下. 正如有d人講, 開心其實係可以唔使錢. 相比起我呢類可以得閒去下遊山玩水的賤民, 重有另一群搵朝唔得晚的貧民, 佢地可能連行多兩步去睇下夜景的閑情逸致都無. 你睇人好, 人睇你好, 呢個世界係咁, 所以唔使羡慕人, 得閒我都係繼續平有平玩咁去遊山玩水.

滄海桑田

香港的維多利亞港, 水深港闊, 令香港成為全球有名的港口, 貨物吞吐量穩佔世界十大港口之一. 不過, 維港面積縮少速度之快, 相信亦會是世界中數一數二. 從客戶的窗向外望, 見到相信是維港最後的填海線, 由此計起, 維港最狹窄的部分應該大約只有一公里.
不斷的將維港收窄, 到底是對是錯, 到今天就算是有識之士亦不能輕易作出定論, 只因當初香港的繁榮亦有頗大程度上是因為靠移山填海而來. 未富起來, 自然覺得這是努力興建; 步進小康, 又會指責這是盡情破壞; 界線之劃定, 自然每人不同. 衣食足而知榮辱, 到今天這已是功績與環保的榮辱之爭.
令人慨嘆的只是十年人事幾番新, 同一個窗外下望, 曾見過停車的荒地, 亦見過繽紛的遊樂場, 更有巨星匯演的舞台; 如今又變成黃土一片, 不免有滄海桑田之感. (更慨嘆是同一個月遇上白事兩宗.... 朋友, 節哀順變.)

薑獨

經過試練, 訓練, 操練, 磨練, 拉練, 鍛練.... 到最後都係白練.

本來經已係出發的時候, 可惜一個騷亂, 乜野計劃都被打亂.

問過朋友, 少少驚就有實有. 但從來無諗過縮沙. 借用一個爛gag, 乜野都好似係食潮州打冷一樣--整定.  不過呢個世界永遠都要睇大圍, 大家話唔去, 你唔可以一個人話去. 旅行如是, 工作如是, 人生如是.... 

不過都係唔話得人, 你夠薑去, 就唔會理人咁多. 你唔夠薑去, 唔怪得人, 唯有怪自己無本事. 係, 咪就係本事囉, 幾十隻眼望住你, 你夠本事, 自然可以獨行獨斷; 你無本事, 就算大大聲講左都唔會有人聽到.

...我諗... 我真係無本事....

由天

百世修來同船渡 -- 有緣成為相識, 總算在無數的偶然中碰上. 要珍惜的, 不是修來的果, 只為在隨機中的一分隨心, 一分隨意.
命裡有時 -- 生有時, 死有時, 悲傷有時, 歡樂有時... 其實有時, 只為有時有之, 有時無之.
富貴由天 -- 既信命, 何必爭, 何必鬪. 遇過幾回杳然離去, 知道一切由天. 然而能夠真正由天又有幾人?
張先生, 一路好走.

昇旗日

今日星期日, 晨咁早走去金紫荊, 事關要去幫下手影下野. 未夠七點去到企定定睇綵排, 影花絮. 點知七點十分天文台整個雷暴警告, 所有野通通取消, 不過跟住又發覺天氣其實又真係十分之好, 兼且大家都唔怕畀雷劈, 於是就在無昇旗的昇旗日照做照影一次, 表演完重有好多來到睇唔到昇旗的同志們拍掌鼓勵添. 其實有好多野, 用心做左, 點都會有人睇到, 有人知道; 就算無, 都對得住天地良心, 雷暴警告都無有怕, 依家望出窗外一樣係陽光普照.

鏹水街

日前澳門朋友到港, 除左招呼佢食住之外, 當然唔少得陪佢四圍行下, 買下玩具呀模型呀咁啦. 不過其實佢都在港生活過幾年, 唔使我帶都自己識窿路, 只係大家一齊行有傾有講咁啫. 但香港環境變得咁快, 有好多野真係行開一排就會唔知. 再加上香港的特式就係好多野都好地道, 唔講其它, 就係街名都會有個本地人的地道稱呼, 一講個名出來就個個本地人都知. 例如囍帖街、玩具街、女人街咁, 而最近大熱的, 就梗係呢條鏹水街啦, 試問又點可以唔帶佢來視察一下呢. 而且佢在呢條街都用左唔少錢, 而我亦都在呢條街為佢流左唔少汗水.
不過講開又講, 下次再去呢度買野時, 真係要抬頭望清楚. 事關 D 天眼原來都係盲盲地, 都唔知可唔可以用隻睇開隻眼閉來形容. 不過物似主人形, 政府咪一樣係有 D 睇到, 有 D (扮) 睇唔到. 所以其實唔使報紙講我都知佢會靠唔住.

西線無戰事

商場如戰場 - 據聞黃柏高每日都是軍服一度以提醒自己要保持在作戰狀態；年前在佐敦街頭遇見駕著軍綠色吉甫車的他的確是身穿綠色軍服；親眼目睹，沒有懷疑。不過曾經親耳所聞的卻令人懷疑到底有真正參與戰事的是那一方。
從來每有投訴或負面評價，最後結論都指向所提交的創意不佳，曾有鐵證如山但矛頭卻仍指向某方。不過月前再度事發，聽到的倒頗有創意。事源不涉及創作問題，到底責任誰屬？自搬遷以來，窗外的動土工程一直被指會破壞風水，故最後這一對天秤便一起承擔了所有責任。原來真的從來沒有管理不善或統籌失當。
其實只是剛讀完的一部小說及又聽到風水之談而引起了無聊的聯想。據聞仍有人會用 "西裝" 作稱呼，不過到了今天當然再沒有人會穿西服作戰。

垃圾

1996年阿特蘭大奧運會, 香港歷史上首次奪得奧運金牌, 到今日如果大家到長洲觀音灣依然可以見到當年女子滑浪風帆的賽果名次寫在沙灘旁邊的石牆上. 尤記得差唔多十幾廿年前, 著名的劉家傑老師無端端走去做奧運主持, 旁述好似係單車賽事結果時, 突然間爆一句話最叻的香港運動員都只係排11定12名, 既然係咁, 香港係唔係重應該放咁多資源落去呢 (大意係咁上下). 所以當年睇住頒獎時, 都有少少想象到李麗珊的心情.
今日, 初次踏足在滑浪風帆的帆板上, 雖然在操控上都叫做合格, 但其實一D都唔係容易, 而且體力同毅力都要有番咁上下, 要成為世界級運動員要付出的就更加多. 在帆板上走返落地的一刻, 突然諗起呢句說話: 香港運動員唔係垃圾.

幾多個十年

九十年前, 廣場上聚集了一群學生, 雖然不見得失去的土地立即得以收服, 但最後國家的尊嚴都得到了維護. 此後五四成為了中國青年的節日. (原來上月的活動以青年掛帥是有根據的, 只能怪自己才疏學淺, 但始終也跟國慶無關)
九十年後, 一群人只想一到國家屬土四周的領海, 但最後連船都不能出海, 到底是誰維護著什麼?
六十年前, 廣場上聚集了一群中年人, 成立了一個新政權, 都擔當了重要的職位. 往後, 他們下令進入過西藏, 進行過文革, 進入過廣場...

六十年後, 火車開進了大西北, 派人上過了太空, 點燃過了聖火... 然而這群人在未退下來的時候, 都忘記了自己也經過數番上落, 被抹黑過, 及曾亦需要平反.

三十年前, 法院宣告遇羅克無罪, 算是文革後給一個青年的平反, 但有關他的書在二十年後才能出版, 而且仍受到重重障礙.

三十年後, 算是可以公開討論有關的事情, 但有誰知道沒有得到平反的還有多少個逝去的青年? 沒有被公開的還有多少 "機密" 資料?

二十年前, 廣場上聚集了一群學生, 雖然熾熱追求的心和七十年前的大同小異, 但最後被摧毁的竟不只是愛國的心. 此後只留下個未能癒合的傷口.

二十年後, 人心不古, 意見更多. 有謝志峰對呂智偉 (在此向謝先生致敬), 陳巧文對陳一諤, 更有不同政黨的對峙. 要正視的是, 九十年來所追求的應該是個核心觀念, 是個普世價值, 而不是為達到目的的工具或手段.

浪漫的年頭

度過了的年頭有很多，浪漫的卻一個也數不出來，或許率性而為的日子只可以稱為任性的年頭。斷線而飛是容易、是困難，要看每人心繫的線而定。 夏日仍然美好，警告依然常在。

簡單生活

雜誌上面影出國內的廚房, 記得以前好細個的時候返鄉下都係見過差唔多的廚房, 不過再對上一次返去 (起碼有七八年) 佢地都上晒三層高的平房, 唔再係咁樣.
以前的人 (及現在農村的人) 都係簡簡單單, 每日煮飯就割少少掛在牆上的風乾豬肉做餸, 食飽就拿拿聲落田開工勞動. 當然偶然都會擔心下天氣唔好, 會唔會打風落雨; 不過每日日出而作, 日入而息, 多勞多得, 自然過自然, 合理過等價交換.
唔知道到底係由幾時開始 "進化" 到今時今日大家每日都話要減肥唔好食咁飽, 食邊樣維他命先會皮膚靚, 行下街先慢慢開工. 當然偶然都會擔心下連卡佛對鞋會唔會無貨; 不過每日最關心都係今日套衫著得好唔好睇, 同最緊要係鬥早同老細講佢件衫今日得唔得, 要點改進. 睇得漫畫多, 我開始相信世上係有賢者之石!

諗法影響感受

偶然感慨說出的一句說話 (反之亦然)，另一個偶然讀到一段理念相同的句語。可惜，放開視野原來是一件十分困難的事！心扉要是不願打開，再放眼遠望所看到的亦只有是眉上的微塵。當然會有眼下不容的，然而亦會有聽說的多多包涵！

建國六十年

明明唔係國慶日, 但又會有慶祝建國六十年. 明明係勞動節, 但係佢主題係叫青少年, 明明成場都見到係唔同省份的攤位同表演, 但名堂偏偏係以香港各界行先. 政府搞的活動, 真係唔係好明. 重有, 叫得各界, 點解只係叫幾隊制服少年團操入場就算數? 企响度成日見得最多其實係國內唔同少數民族的青少年! 講返轉頭, 企成日都係到最後等一隊出場啫, 結果又都取消埋. 好彩, 咁遠水路過到海, 都有做到少少野. 不過, 講到結果, 真係唔知道到底呢日係唔係做到有意義嘅事.

快樂

貼上這一篇文章，因為它令我想起了朋友的一句說話。 「我係一個開心嘅人，但係我唔開心嘅時間係比開心嘅時間多！」當然都知道這只是他的一時戲言，其實他只是抱怨及發牢騷的時間比較多吧。
它亦令我發現原來查理布朗的想法原來和我都一樣。可惜我的英語不好, 而花生漫畫又用太多俚語，很多時都看不懂。 不過卻記得朋友也有說過我跟查理布朗相同的地方... 都是「天生的失敗者」。 個人來看也頗喜歡這比喻，只要有一次不失敗便可以很滿足了，那不是很好嗎？ 成功 - 是不是有點太遙遠、太辛苦、也太認真了吧。
突然想起了阿Sam的歌：快樂是陽光普照的清晨，快樂...

夜宴

星洲友人返港, 當然要一齊出外聚舊一番. 飲飲食食, 把酒談歡一定少不免. 不過現在同以前比較的確真係無飲得咁多, 結果要勞動到朋友送返屋企, 搞到夜上加夜, 真係唔好意思. 下次真係要節制一下, 唔好搞到又要勞煩到大家.
不過好彩係香港地的交通網絡又真係幾方便, 換咗係日本或其他國家, 夜得滯想返屋企都唔知點算?! 在香港, 又有巴士地鐵, 夜左亦都會有小巴或N線巴士, 就算搭的士亦都唔會太難同太貴.
唔止交通, 去玩去食亦都非常方便, 你想食任何口味的餸菜亦都可以搵到, 任揀唔嬲. 真係香港幾好都有, 問你點捨得走? 而且, 重有落住雨都有咁靚的夜景呢.

馬交廿四小時

今次再到澳門一遊, 主要目的為將在東瀛之遊中代朋友所購的貨件送到朋友手上. (以為可以用到濠會咭去出張免費船飛, 點知優惠剛剛取消, 真係整定用唔到)
一到步, 朋友經已在碼頭等候接送, 之後重打搞咗佢成日, 又食又住. 食, 又有沙巴急凍鮮魚, 又有花膠海螺湯. 住, 又有企理客房, 兼重包埋早餐. 都算得係又食又拎. 呢位朋友, 真係唔話得.
行程中最重要係要試晒所有火車模型, 結果真係試玩咗成六個鐘. 第二日早上遊覽咗消防博物館同通訊博物館. 跟住又食佢一餐晏. 然後又坐佢車環遊下澳門, 試坐佢兩部電單車, 絕對係行程安排緊密, 節目豐富.
最後由佢一手一腳送到碼頭, 完滿結束整個行程. (回程亦都係坐唔到 TurboJet, 結果坐咗尖沙咀船返香港)

東京へ行きました

一個巧合的機緣;
一句應酬的對話;
一個隨意的答案;
一個大方的決定;
一個咁都唔放過的抽水機會;
一個朋友的委托;
一個東京的旅程;
一個難得的寶貴經驗;
一麵一心,
一樣的原理!

攝記

一年一度, 又係再拍多三條片的日子, 今年係藍地、薄扶林、果欄. 雖然都有因為落雨同好多環境因素影嚮到少少, 但都算無驚無險, 算係順順利利. 如果大家的信念無錯, 今次都應該會再有返d迴響, 但有無都好, 總算係做左野、出左聲.

講開信念, 唔明點解每次開頭都要覺得係人地有問題, 點解唔可以幫對面諗諗, 有時去相信對方始終都會明白事理, 會可以和平解決到問題. 當然都會有唔成功例子, 但起碼我重相信. 希望大家都試下去相信.

のんびりしました

昨天悠閑的到山頂走了一圈, 簡單的活動配合良好的天氣加上美麗的景色, 就這便過了一個愜意的下午. 天氣看起來是有一點迷濛, 但其實那只是下沉在近地面的煙霞, 再望遠一點的話可以明顯看到上半部的天空其實是很明朗的.
望到在照片右方的怡和大廈, 想起以前這康樂大廈曾是全港最高的建築物, 有四十多個樓層; 但今天普通的一幢住宅都有超過五六十層了. 像以前的領導人說: "俱往矣, 數風流人物, 還看今朝", 現在傲視維港的是眼前一對在兩岸對望的新廈. 當然, 往後還要再看他朝... 不過現在... 懶得去睇啦, 理佢咁多做乜丫!?!!?

斜陽

昨日, 窗外大廈的狹縫中透入了一線夕陽的餘輝, 在光線劃過的彈指間, 心情忽然感到一剎那的輕鬆及平靜.  只待須臾, 一天的紛擾與繁囂將漸漸遠去, 又可再抖擻精神專心工作.  無錯, 工作, 係要用心架.

新office

乏善足陳... 整體尚可, 但間格奇特之餘亦有頗多不實用之地方, 像每日都有一定人流的pantry竟然小得可憐, 本來以為可以讓同事舒適用膳的房間郤沒有像樣的枱椅, 座位是加大了但似乎反而更難有效的運用增加了的空間.....
對我個人來說, 慶幸的是還可以走到角落, 放下滑鼠後, 仍可有一片寧靜的天空.

...茫茫然度過

今天, 正式告別了鰂魚涌, 轉到去北角繼續拚搏. 用手指一算, 經已在這裡獃了整整十六個年頭. 和初來的時候比較, 還是一樣的油站, 只是轉換了不一樣的公司. 可能是初出茅蘆的關係吧, 對在這裡第一間公司的日子依然懷念, 至少有同輩中大部份都是沒有機心的朋友, 每天互相幫助, 互相扶持的過了無數天昏地暗的日子. 還記得曾為不平而發言的日子, 為替人爭取而和上司爭論的日子, 興致勃勃去組織同事間的活動的日子.... 那份心力, 不清楚是經已一去不返, 還是現在經已沒有值得再去出力的原因或人和事.

認真的算, 十多年來只在兩間公司工作過, 的確可以用獃來形容, 還記得友人的說話.... 你為了那一份義氣、那一份感情而留下來, 別人只會說你儍.... 你不跳去別的公司, 人們只會應為你沒有材料, 不會賞識你的那一點情份.... 其實, 十多年來到了今天, 是的的確確感受和理解到這現實的. 但可能是天生愚笨的關係吧, 始終不能學曉那一份世故, 更可能是人變得愈來愈畏首畏尾而停滯不前.

最後拍得的是凌亂的工作桌和窗外一片灰濛的風景. 到了新地方, 桌上應該依然是一般的一團糟, 窗外還是那一片灰濛的天空吧.

上會

講左咁耐, 上星期終於都入左會, 今後去濠江會起碼慳返一張去程飛, 因為身為會員應該可以有一張免費去程船飛. 但回程話要唔知點樣去玩幾耐先可以拎到飛... 好複雜. 其實都係諗住得閒可以去探下朋友先入會, 重有係如果有時如果有任何貨物要畀佢, 都可以好豪咁話等我幫佢帶過去. 呢位仁兄咁好招呼, 走一兩轉都無所謂. 而且都只係一張回程飛, 濕濕碎啦. 不過, 優惠會 last 到幾時就真係唔知啦...