南下尋歡

初二日下午與陳年好友同遊南丫島繼而一頓豐富的開年海鮮宴兼在大螢幕電視觀賞煙花會演，行程絕對安排悠閑及隨心所遊的確係賞心樂事。意想不到係回到市區有另一班更陳年的好友即興突發唱K到天明，除有較年輕的朋友唱新歌之外當然老歌亦不能少一時之間電視螢幕上一眾已仙遊之歌手此起彼落濟濟一堂。更意想不到係以為初二會較少遊人但在島上反而見到多個賞煙花旅行團，領隊旗大大話話有十數支以上。經過同行友人幾次問道到底參加團遊每人要幾錢，意思相信都係想在下出口去問，一問原來參加工聯會之煙花海鮮團每人只需二百四十元更有專車專船接送絕對超值。友人都話應該快入會以待明年可以參加，而且更說今年會有政黨相關活動應該春茗蛇宴陸續有來。但到底食一餐同投票有幾大關係個人真係唔知，不過近日在電視上見到一眾巨聲頻頻亮相就想起不少演藝人士入行以為可以身光頸靚有型有格實質一到特別時節都係侷住出鏡唱賀年歌，買豬肉點都會搭豬頭骨不過未要唱小明去拜年都算係咁。