人生就是總和力

這說話是來自最近看過的書 - 佐賀的超級阿嬤

 

一直都相信，平凡的人才是真正的英雄。給人最多感動的都是最普通的故事。作者的婆婆，做的都是平常事，抱的都是平常心，說的都是平常話；在簡單的生活中根本不用任何人去寫，不用任何人去記錄。可是當世界變得複雜了，簡單平常的事情都變得難能可貴。

 

人生中每人的際遇都不同。並不是每個人都能成為了不起的人，有人用頭腦，也有人用勞力，社會就是靠總和力才成為社會的。只要大家一起努力、各司其職，各力的總和便推動了整個社會。但隨著時代進步，真正了不起的人會知道合成為總和的數目可以是正數，可以是零，也可以是負數。

 

婆婆也說：一萬個人生下來，總有幾個出故障的。那大家就應該抱著豁達的心情去接納一切。像我們這些有故障的，當然沒能當大任；高薪要職，都是讓有能者居之吧。

 

婆婆再說：到死以前都要有夢想！沒實現也沒關係，畢竟只是夢想嘛。這個我懂，白日夢絕對是本人的專長，能不能達成的確是心知肚明；想做的實實在在的去做便是了，沒必要計較得失，也沒必要公告天下。

 

人生是不需要追趕時代的，也並不是用來炫耀的，雖然再也不能回到以前簡單的歲月，但如果一切都可以只單純的由心出發，由衷的關切別人，世界也會變得更可愛；婆婆說：真正的體貼是讓人察覺不到的。

二副

一路都知道自己無乜本事，無乜恒心，從來都無乜野係可以好好地學得好好睇睇；不過都無乜所謂，個人依然都係好同意人怕出名豬怕肥，叫我去出風頭拋頭露面擔正大旗就係咪搞我，最好係是是但但求求其其又一日。細個的時候唔識諗實會想有時都會想有人留意下，到大個時就會知道凡事最好都係自量下，低調啲唔好咁張揚。
[講開識諗，又有一番謬論：細路八歲時會覺得自己大個仔，到十八歲睇返當然知道八歲依然係小朋友；廿八歲睇十八歲會覺得當時根本未長大；卅八歲再睇廿八又會覺得重係唔識諗；相信到四十八再望返都會覺得卅八依然係唔夠成熟...一句講哂真係唔好自以為是。]
做人叻唔叻其實真係無乜所謂，世界上總有人讀書叻，有人運動叻，有人有天份，有人生得好睇，有人有家底；當然，在一切都在隨機的情況之下實會有咁啱咁多樣野都發生在同一個人身上，亦會咁啱你自己一樣都無，既然機會均等就真係無得好怨。
凡事，如果大家都畀咗心機，就算只係做下副手又有乜所謂。

記錄

衣食

衣食足而知榮辱。
現今的世代，炫耀是榮，落伍是辱。
結束一頭龐然大物的生命，在意的只是一小部份的美味，捨棄了的到底是動物的還是人的尊嚴？
為積德而選食齋菜，享用耗費資源數翻蒸煮再千方百計裝成的山珍海錯，是種了因還是做了孽？
越是受過高等教育就越懂得挑精選細，日常用餐、穿戴用物等皆遠超出了生活所需。
眼闊肚窄追求精巧美食、為趕時髦喜新嫌舊、識飲識食識享受，想必已成當今的生活標準。

鋤禾日當午，汗滴禾下土，誰知盤中飱，粒粒皆辛苦。

神山行

講足四年，約極都約唔成的神山之旅終於在月前得償夙願。
話說在大約在八九年前，友人在沙巴結婚，於是捱義氣去到一個叫斗湖的地方做伴郎。當年的經過到今日都記得七八成，熱帶地方，經已唔需要著西裝禮服，但只係裇衫一件都汗流浹背... 當時因為工作繁忙，只有請得幾日假，以致婚禮翌日就急急腳走人，無時間四圍遊覽，但係就好記得友人提出話下次再次到訪的話會盡地主之誼再帶去四出遊玩，更可一嘗爬山之樂。
爬山？唔係出名的話或有番咁上下風景，應該唔會推薦叫人行，一問之下知道原來是東南亞第一高峰，當時只想有時間大可以去走一轉。到後來記得好似話有一隊唔知係英兵定居喀兵在神山區域內迷失方向，成個幾星期先搵返，因而有興趣一遊。再加上電視雜誌講到有幾難行，又唔係個個上到頂.... 在四年前開始決定要去行佢一趟！
當然，講咗咁多年都係問親個個都話想去，到報名就無人去；把心一橫，今次本來諗住一人成行，一早叫友人訂位。點知呢頭落order，過兩星期就變咗八人成行，十分感動。
去到、上山、攻頂、落山，原來都可以學似同行友人咁講以家樂徑去形容；只係全程需時比較多，持續上同持續落比較大負荷，除此之外實在真係並無驚喜。當然對於一向少運動之人士亦有一定難度。但更令人印象深刻反而係模黑上山一段的互相扶持，連平日行多步都喊攰的友人亦勇往直前。今次，諗起以前讀書學到的... 醉翁之意不在酒...

自由鳥

對了，自由自在的鳥兒，是自由自在的在天上飛，自由自在的隨意歇息；請不要硬插人為的解釋，甚麼自來鳥是好運，黑鳥是霉氣，唱詠是報喜...

下雨天

每逢天雨不能駕車，都會選擇在荃灣下車沿海旁步行回家，一般的情況下在大雨的晚上都不會有人在當風的海旁行走，所以每次都可以獨佔這個偌大的走廊廣場，獨自欣賞在雨點反映中格外閃爍明亮的夜景。走著的時候，想起了某電影的主角提到在聖誕夜逛街是最好的，因為在西方國家的聖誕夜必然是空無一人及所有店舖都關門，整個街頭都屬於自己，情況便跟先前提到的一樣。不過現在香港就算是大年初一所有店舖都會開門營業，很少會像小時候去拜年時所經過很多貼上何時才營業的大閘，其實感覺上依然覺得所有店舖關門才有過年氣氛。
其實個人並不是貪心要獨佔整個廣場，平時經過時見到有人放狗、放小孩、放單車等都會十分開心，只是天生怕多人怕嘈吵吧了，亦只是不同情況下經過會有不同感受。世間上應該是沒有任何事物是只屬一人的，看多了人在爭功、名、利、祿、寵，再看自然世界的一草一木，那怕只是一點一滴雨水，都感到心情份外愜意。最近看見友人的照片拍了個關著假鳥的雀籠就突然覺得很合情合理，真正的鳥兒不是應該是自由自在的在天空中飛翔的嗎？

雷鳥

從小都是一個怪人。看電視卡通漫畫都不是喜歡最強勁華麗的主角；機動戰士中最愛的是渣古及吉武，原因只為覺得設計似乎比較合乎常理。超人片集中愛看的是飛天紅中俠；縱可以有超乎常人的能力亦會有難於駕馭及撞板闖禍的時候。眾多配音片的主角並不是喜歡艾朗西或昆西等神探神醫；反而喜歡像鐵騎巡警般講述普通日常事件的片集。相信可能不會有太多人喜歡雷鳥拯救隊；沒有突出的主角、沒有百變的機械人、沒有超人的能耐，但當時看時總覺得它比起日本卡通中的變形變身更合理平實得多，每次的行動中也都會似模似樣的跟據正常物理去以合適的器材器械去作出營救。當然，現在想起都知道所有的以為平常合理的情節故事其實都不合乎常理；但現實中何嘗不是一樣。沒有變的想法是，普通平常就是最好。

無聊

近來聽到及讀到的無聊句語：

 

如果是必須要做的事情，只要有百分之一的可能性，就要付出百分之九十九的努力去實現它。

正經思考不正經的事，純屬徒勞！

墮落的人，都是從自己開始墮落的。

不管搬到哪裡，運氣不好的家伙運氣就是不會好。

 

最唔無聊的一句：

你今年唔老，出年都會老；今日唔老，總有一日會老。點到你唔認老！

富貴碧人

上週有幸參觀港島東半山豪宅區之豪裝單位，裝修一流不在話下而且一出露台更景色頤人。屋主乃從事創意工業人事，室內佈置當然亦一絲不苟，睇落簡簡單單其實絕不簡單，坐落舒舒服服實情真係非常之舒服！相比起區區之家徒四壁，只有單車一部孤立一旁實在不能同日而語之。眼見身邊多人皆出入富貴門戶，又有西九、又有東半山，又有跑馬地，更有正宗半山區，不禁暗自汗顏；可幸區區亦知道各有前因莫羨人，自己無本事就真係諗都唔好諗。

講返屋主亦都真係唔話得，出身自豪門但都無乜架子，當然日常談吐及生活習慣中會感到佢來頭非富則貴，好在佢地眼角亦正正常常地生在合理高度，區區呢類屋村長大兼衣衫襤褸的企在佢地旁邊亦唔會被佢輕視。比起企在另一類身穿貴價華衣美服、用過萬元名錶名牌手袋的富貴人家身邊，真係會見到佢對眼話你唔入流，你識少個牌子都話你out。

查實區區之前亦都有認識過富有之人，作為朋友當然都會有出外逛街遊玩，不過相處一段時間亦會深深體會到貧富之間的差距。簡單之分別當然係出入之場所氣派十足，買野食野亦都永遠不用睇價錢，時節送禮更是一擲千金；要過呢種生活真係諗都未諗過，同佢地來往得密亦都會感到負擔唔起。區區當然知道食幾多著幾多係整定，不敢奢求之餘唯有量力而為兼且有得食就食多d。好又一餐，唔好亦都係一餐。

水塘•遊記

因要準備海外行山之旅，到久違了的城門水塘一遊，以作鍛練。記得小時候常跟父母到此行山，以此作起點到過了沙田、大埔、川龍、大帽山等；隨著人的慢慢長大，開始少了跟家人郊遊。到了中學的時候，依然有不時到水塘一遊；當時大多數都是跟同學到此燒烤，或每到中秋便到來夜遊一番，但都只是漫無目的的在黑夜中閒逛。到了快中學畢業的兩年，又因體型肥胖的關係每天上學前都到此環繞水塘跑步，務求將三十多寸的腰圍減去；在還沒有氣墊運動鞋的時代天天穿著 "白飯魚" 在極斜的斜路上跑下來，結果點滴累積下來的撞擊兩年多後在膝部響起了警號；從此便越來越少到城門水塘了。今次舊地重遊，在剛到達水壩的時候才突然驚覺起原來自己一直都遺忘了一個郊遊的好地方；日後鍛練完畢，閒時亦要不時上來悠閑地漫遊漫遊。

退役

今次係到陳校長的文章，佢提到wargame可以訓練領導才能、團隊精神同個人警覺性等等。個人來講，其實都只係志在玩下同打晒所有子彈發洩下咁啫；打完開開心心講下笑下咪幾好，唔使好似佢咁講到咁嚴重同認真。但係佢講到話要誠實呢樣又的確係好重要，如果唔係我都唔會打到唔想打。家陣在場內要面對的 hardware 真係好 hard，係艱難辛苦個 hard。以前就話大家鬥快衝前去霸佔有利位置，現在係人地的火力勁到唔使走上前都打得到你；咁都唔緊要，走到位識避都重有得玩，但係個個都係鐵人打極唔死就真係無得玩！

有時真係唔明白，點解成日都見到個個人都咁怕輸？有細路打機唔想輸搞到喊晒口，有人分手互相指責沒完沒了唔認輸，打wargame中彈唔死唔肯輸不在話下，打波有foul唔認foul兼射波唔入又話人地有foul亦都係唔肯輸，明明間公司細到爭完都無得你上位但都係要阿諛奉承驚輸蝕畀人，仲有係搭車搭地鐵爭先恐後上車爭位坐落車爭出閘下下用身位頂住怕遲咗會執輸，就連平時傾偈講普通野都要鬥快鬥叻唔肯輸... 唔明，誠實同認輸真係咁難？

香港人最奇怪係在無得唔認輸的時候會講得出好似 "今次係輸運唔係輸人"、 "輸人唔輸陣"、"輸陣唔輸精神" 咁樣的怪道理。贏多次或者輸多次到底有幾緊要？個個贏咁始終都會有個輸。最慘係...野戰，都可以話退役唔玩；做人，無得唔玩架喎。

其實... 如果次次都贏，咁邊度好玩架？