咖啡因公園

今晚高興地遇到了親切的環保客戶，原來他也是個充滿節奏感的美少女鼓手。曾經練就八級的造詣，就算是近來生疏了及被臨時拉夫，依然是有板有眼打得自然流暢。咖啡因，果然醒神。
原來喜愛上音樂是可以遇上很多同路人的，只是別人一早已起跑並遠遠走在前頭，雖然並不會有輸贏的比較，但打個不貼切的比喻就是連輸在起跑線上也稱不上，更不要說資質上的分野。
不過既然沒有輸贏，就讓區區獨自的龜速爬行吧。地球是圓的，只要願意繼續爬行，總有一天會在前輩們再次超越的時候在跑道上再次遇上。

心靜自然涼

在公司樓下發現海報一張，原來在推行一個無冷氣夜。都已經九月尾，實在唔多機會開冷氣，搞同唔搞真係無分別。講真今年夏天唔算係熱，見天氣轉涼諗住熄返冷氣分機的總掣，先發現原來房間的冷氣掣今年無開過，的確值得記錄一下。其實今個夏季的晚上以電風扇納涼經已足夠，人人都開住個冷氣結果都係互相將熱風吹到對方的窗邊，細個住公屋時無冷氣都比現在涼快......咦？！到底，是否因為年紀大身體差開始唔受得冷氣？

打擂台

從一篇訪問梁小龍的文章中讀到他的一段說話，大意是說練武講到底都係要打交，如果想強身健體的話不如去游水跑步踩單車。個人十分同意這說法，好相信如果唔係有法律條文規限，絕對有大把人在街上拳來腳往，甚至刀光劍影。得閒無事走去學打拳，無論點都係同好勝心有關，唔理得你到底有無出手打過人。偶然一次到過羅新門一遊，原來打沙包的確要花好大的氣力，要認真去練武真的不易，當然要在人前顯露一下威風或身手就一定要付出代價。
看過電影，才知梁生的一段說話在戲中亦有出現，到底出自誰人手筆不得而知。原來戲中還有另一對白，唔打就唔使輸，要打就一定要贏，相信追求呢個贏字的大有人在。不過，點先算贏先？！

大家跟住唱

無謂的廣告計畫當然要包括無謂的贊助活動，無意中找到的表演場地無意的發現原來是眾人都去過的地方，無必要加設的小環節自然無必要擔心有無人參加，無寄望有熱烈反應的演出當然無寄望客戶會有一句半句多謝，無幾多人出席亦都無幾多野在現場要做。
不過未試過聽呢類演唱會又發現現場氣氛其實唔差，自由地走來走去飲住啤酒聽歌確係爽，無須手舞足蹈亦一樣自得其樂，行近台邊又可以觀摩一下人地係點樣打點樣彈，難得大家又唔介意夜嘛嘛加班，咪就當睇返場平日好少睇的演唱會。
開工，其實好閒。

力有不逮

外遊中看見一支比較小型的結他，到底是貪新忘舊、到底是見異思遷、到底是見到有平價二手貨、到底是經常帶一大支出外唔方便、到底是怕重怕熱怕辛苦、到底是已養成洗腳唔抹腳習慣、到底係點解？

話到底，最主要都係唔想出街畀人見到揹住支結他周街行，事關人人見到都問你係去邊，人人望住都會以為你識得彈，但其實講個識字自己都會覺得汗顏。揹住支細少少的，汗顏的汗水亦都相對流少滴。

話到底，要揹出街的日子亦未知仍有幾耐，本來以為只會玩幾次的又結果堅持到年多的日子，不過空有熱誠又不見成果仍然會令隊友失望，只好怪年紀大機器壞就算勤練亦難以背熟曲譜。

話到底，未學行先學走當然無好結果，原來行得好好地又轉用另一個行法都係一樣無好結果。結他細了重量輕了彈起來的感覺都完全不同了，反覆試練始終未能掌握。

話到底，技術不行了。一句到底，技術何曾又有出現過了？！！

我不是選民

從來都很少參加集會遊行，對政治全無興趣，誰出來因何事是否抽水真的沒能力分辨。

議員的政綱只覺是天花亂墜，誰人主政毫不關心，所以亦懶得登記做選民。

不過有關新一代的未來，無法不用腳去表明心中一票，集會總算完結了，但似乎事件仍未完結。

坦白說，所聽到的字句用辭的確有點過於偏激，不過都不能說是理據不充分。

做一個好官真係咁難？都話過無興趣，唔好要我再一次再走出來！