熟客

早兩日去到一個唔算係客人的客人的開幕儀式，見到十分之多人而且又有好多人十分主動咁同你傾偈，搞到個人十分唔自在真係以後有呢類場合真係要盡量避免。
從來都唔識應酬，無論同任何人一齊都唔知點去搵話題。就連日常人經常講的"食咗飯未"或"得閒飲茶"等都講唔出口，唔聲唔聲所以從來都無特別的店舖可以成為熟客。唔係熟客亦都有好處，起碼唔會一見到你就問長問短，點解買咁少或者近來咁少幫襯等，一陣又話今日蘋果靚，一陣又話雪梨好新鮮真係唔知點應佢好。
有人話可能係諗得太認真了，大部分人都係東拉西扯隨口講下就算實在不必要想得太多。但諗落完全無意思的話即係敷衍了事咁實在真係毫無誠意又過唔到自己的一關；雖然越來越無記性問完人的事好快又唔記得都唔好得幾多，但起碼都無當係應酬人地咁去九唔答八。而且總有某幾類人你唔會想同佢講野之餘佢地亦其實都唔想同你講野，咁不如講少句無謂大家都辛苦正所謂"彼此也在捱"。
唔識交際自然朋友不多，幸好都重有幾位友人唔介意在下呢類不擅辭令的怪人，坐低唔講野亦唔會話覺得有問題，閒時都可以即興去搵人打下牙骹，無謂有無謂講而正經又有正經講，最難得係佢又唔嫌我阻佢做生意真係唔話得。