氹氹轉

談論已久的澳遊終於成行，不過澳遊變氹遊，全日就算由碼頭開始計起都只在方圓三公里內走來走去，兜兜轉轉就在氹仔過一日真係你估佢唔到！
行程其實完全無計劃過，心諗既然有提議食蟹粥，可以由官也街開始，趁天氣熱到賭場抖抖暑，再到路環一訪安德魯葡撻本店兼行海邊及聖方濟各教堂，有時間到黑沙海灘走一走或到三盞燈食個緬甸魚麵，下午茶可以到得勝馬路飲個煉奶滴漏奶茶，照計唔會胃口大到食埋祥記雲吞麵但義順應該都可以一試，去內港食完葡國菜後杏香園實無得走。
奇怪係十一點船要到兩點半先食午餐，從來無諗過要去的葡式住宅博物館又在外面跳足個幾鐘，花旗骰又擲掉一個時辰。怪只怪自己次次都有專車接送，一講到要搭車行路自然就唔知頭唔知路，全日邊度都去唔到好彩都無人投訴算飲得杯落。
預想唔到的更有，本想趁團友到賭場拚搏時跟馬交友人來個茶敍結果安排唔到，之前蟹粥明明水到唔水今次食又似模似樣，同埋晚餐從來無諗過會去木偶。講真，晚飯所點的菜式其實唔算好味道；不過，同一班好玩的友人一齊就覺得呢餐好好食。