月黑山高

早前跟友人趁月蝕去了一趟月黑風高行山夜，同行一大班人有尼泊爾人、有國語人、有英文人、有帶腳架靚機的攝影人、更有唔識路又行先帶頭的領導人。結果諗住約行六個鐘的行程行咗九個鐘，不過雖然天黑黑但沿途都唔係完全無野睇，起碼友人可以指出深圳方面的明斯克號的剪影令日後的單車之旅都知道隻航母實際響邊度，而且一路睇住月有陰晴圓缺以及明亮的星空亦都樂在其中。
其實有時同下唔同職業、唔同年紀、唔同出身的人相處下的確係可以增廣見聞，不過人的性格又始終離唔開見慣見熟的幾種。好在同邊種人相處及對身邊環境的撰擇在某程度上嚟講仍然可以由自己揀，唔係上等人真係唔好走去群埋一班富貴人家，電視話 "汽水係要裝喺汽水樽度先好飲"，一講在下即刻完全明白。電視教多一句 "有時啲野講完開心咪算囉，唔一定要做到"，哦... 終於都明白哂。

價值連城

到訪友人的舖頭，老闆娘煞有介事的拿出一條以鋁箔包著的物件，要在下估一估到底價錢是多少，點睇佢手上都只係一條番薯，以為佢在街市買到平野。跟住佢打開一睇，原來包裝上係煨番薯但係內裡係一塊沉香木，心諗一塊木頭頂多幾萬我估夠佢十萬八萬，睇怕老闆娘怕我唔信所以亮出成交的支票作為揭盅 ── 二百萬一塊木頭的確係要影低留個記念。據聞此一外觀對稱完整的沉香木實屬百年難得一見的貨品，所以馬上都湊近大力索一索，相信該陣味道都已值幾百。同場更見識了四萬元一小磚的極品普洱茶，一啖都值幾千，真係貴過你甚麼八二年紅酒王。所以話，以貌取人(物)、失之都絕對不止是單單一個子羽。

廿多年

經過身旁眾多友人的談論及連酒廊酒吧內的啤酒美少女都大嘆晚晚要聽起碼幾次那些年，終於都抽空看了這近期大熱的電影。但個人對此並沒有多大的共鳴，其實學生時代每人都曾經反叛過或想反叛過，與身邊的同學互生情愫亦是必經階段，所以任何人都總可以找到自我代入的空間。劇中最後多個片段都帶出本來有很多認定對方的場景但都總是在機遇中錯過，這些更讓大家對過往的未了緣添加了無限的想像空間。人生並不是有很多事都徒勞無功的，得到的總會有教訓、經驗、回憶；戲中常提到幼稚，保留一點年少的衝動衝勁不是很好嗎，一份天真的誠意不是更難能可貴嗎。

謝小姐，當年送你的舊結他還在嗎？ 祝你生活愉快。

女皇的新衣

一朝天子一朝臣，各處鄉村各處例，今次未知是一時興之所至或早有安排，結果每天上朝的大殿換了個地方。其實這未嘗不是一件好事，查每朝眾宦官重臣向皇上稟報的奏章內容經常千篇一律，而且亦只有是聰明人才能聽得懂的，故每每令旁邊的庸人自擾。如今早朝換到了另一個福地亦令賤民樂得清靜，可算是一舉兩得。

自小未有勤奮用功，所以未有熟讀安徒生童話。請問，有沒有人知道國皇的新衣中那天真的小孩最後下場是怎樣的？