傷逝

兩個幾星期... 最痛苦的日子終於都捱過, 不過傷痕依然不滅. 跟住來會係依然痛苦的後遺痛症, 真係可以算係身心受損. 諗左成兩個幾禮拜, 結果又咪係得個吉, 陰影還陰影, 諗同做點樣都係兩回事, 最後都打回原形, 由零開始. 又或者其實係好彩, 正如古語話 - 桐油埕始終都係裝返桐油, 都係算吧啦, 點講都係聖誕, 亦都因為係聖誕, 所以都係同各位講聲 聖誕快樂!

金句

又偷人地的說話, 我發覺我有個朋友將呢幾段字貼在電腦旁邊. 其實呢D都可以當得係警世名言, 老人家講的說話點都會有幾句係有道理. 不過信唔信同聽唔聽就睇你自己啦. 好似我朋友咁, 好似都唔係咁領略到最後的一句...

拍攝花絮

分開兩日的拍攝工作, 每次朝十晚二, 都咪話唔攰. 不過食得鹹魚抵得渴, 學人話齋 "份糧有包架", 都無乜怨言. 而且都係同一句說話啦, 都係睇人做, 又唔使自己做, 怨都唔輪到我. 睇見同事撲來撲去, 都做埋唔少冤枉野; 其他人亦使出畢生絕學, 可以形容為妙筆生花、點石成金; 重有係得十幾度天氣, 個小妹妹都凍到流晒鼻水... 咁我行行企企一日, 都唔算好辛苦丫, 諗落, 重學到野添...

隱形

戴了廿多年有框眼鏡, 終於鼓足了勇氣去嘗試將一塊手指頭般大的膠片放入眼內. 一直覺得只是一丁點微塵飛入眼內也會感到萬分難受, 更不用說是一大塊膠片了. 果然不出所料, 試了十多次, 流了不少眼淚, 花了很多時間才成功地將隱形眼鏡成功戴上. 據聞我試的 one-day 經已是最軟的, 以前朋友用的是比較硬的物料, 試戴時...
咦. 原來戴起上來是挺舒服的, 經檢查再換上更合適的弧度鏡片後的感覺便更自然了. 經過昨日的測試, 在球賽中也頗能適應, 乾澀的感覺可能是之前駕車時的後遺症吧 (以駕電單車來測試可能是苛刻了一點). 臨床實驗成功, 將來也多個選擇了, 最少可以避免打球時打破眼鏡或因撞到眼鏡而受傷.
不過, 發現了兩件事情. 原來年紀大了, 近視真的會褪減. 同行的同事發現原來我的眼睛很大, 我想可能有框眼鏡比較適合我 - 可減輕看起來眼神太兇的感覺.

星願

偷來的文案：

 

我向星星許了個願.

我並不是真的相信它,

但是反正也是免費的,

而且也沒有證據證明它不靈.

光陰

從25咭走到41咭, 真正體驗到時光飛逝. 中間的轉變包括了從沒有e-mail 到一日有過百個 e-mail, 從未有internet到無一日開工可以唔上網, 從 call 機到手機, 返工地區從上環去到鰂魚涌... 經歷過金融風暴.危機.海嘯.地震.沙士.裁員... 有學到野, 有學唔到野, 最近學到一句 - - 不忘初衷

賽果

球隊在開blog後首次贏波, 其實呢個blog最先都係用來為球會blog先試下d網頁function先開, 見橫豎開左先慢慢自己post d 無謂野上去等第日有得笑下. 呢個係開頭試造個blog logo 的原裝 file. 真係獻醜...

高清機頂盒

今早幫朋友去 Sharp 的服務部換領高清機頂盒. Sharp 的服務員姐姐超好人, 又有禮貌, 如果有最佳服務員選舉, 我一定投佢一票 (無錯, 我真係覺得投下呢d 起碼對人有個鼓勵, 好過投d 無乜實質政綱同表現的立法局議員). 劉華真係講得無錯, 服務態度真係好重要, 如果我下次買機, 價錢差唔多的話我都會考慮買 Sharp 先.

至於機頂盒, 點都要試下佢有無事, 唔係點交貨畀朋友呢. 原來我屋企都經已有高清訊號, 不過我部機無咁高線數, 睇唔出有乜分別, 只係睇到頂同底有部份 cut 左. 但其實以我的要求水平, 就算我有高清電視, 都應該唔會覺得佢有好大分別.

不過講開電器, 開始又有d 唔明, 以前買電器唔會好似而家咁下下都要插火牛. 既然畀得火牛我, 都知我係行濕電啦, 你造件野行 DC 想點呢下? 又唔造多個入乾電位? 明知要駁多件野咁點解又唔造到內置有埋, 唔使又要用多隻牛咁煩?

Bierfest 2008

即係德國啤酒節, 都有好幾年無去過, 朋友叫到, 我每次都會畀面出席. 不過今次約埋去的人都臨尾縮沙, 結果自己一個應戰. 因為友人仍要在場內工作, 佢好細心咁介紹左佢朋友及細妹我識同想安排我同佢地一齊坐, 但係三唔識七同重要係夾左幾個德國佬, 我最唔識應酬又兼夾唔想講咁多英文, 所以都係自己周圍行下睇下先. 等友人得閒先至再走返過去坐. 其實我有少少唔係咁適應呢類場合, 見到個個企晒上枱跳住來玩, 我自問真係唔係咁熱情同唔會投入成咁. 不過好彩海運停車場個海景又真係一流, 就咁飲下啤酒吹下海風, 睇住幾隻麗星郵輪行出行入咁都幾舒服 (講返香港的夜景真係無得彈, 其他都話出名的拿坡里同函館真係無得比). 查實就算要畀錢入呢個啤酒節都唔算貴, 入面啤酒價錢同去普通 Bar 差唔多, 野食收一舊水都幾大碟, 佢入場費$99包有野飲有野食都算合理, 而且重有節目你睇. 出年朋友再叫我都會再去.

意國行後記

旅行回來後只幾日就病倒了, 而且係要請病假的一種. 一直以來, 只係每兩三年先會大病一次, 都算唔錯啦. 今次因為真係搞到返唔到工, 唯有去畀醫生睇下. 不過照以往一樣, 都係無食到佢d藥. 始終, 抵抗力都係靠自己好d. 不過其實每次醫生畀d藥都好特別, 有時會話需要時服, 照計如果我無需要, 你都唔會開畀我啦. 跟住又搭多包胃藥, 點解唔發明d唔傷胃的藥呢? 搞到每次都開成四五種藥.

自己個病都係小事, 個市大病先至係大事. 對面同事同我講, 去左旅行其實係件好事, 因為連續日日都見個市一千幾百咁跌, 由萬八跌到萬四, 行開左好過日日見到個個都鞋口鞋面. 不過都無用丫, 佢講完成個星期個市都重係咁跌, 今日去到萬二. 其實我都係剛開始學人買少少, 對我影響唔大, 不過身邊好多人都好唔開心. 如果慳番d藥可以畀個市食左好返就好喇.

意國行 - day 15

羅馬 - 天晴
最後一天, 終於可以進入世界第二大的教堂, 果然很宏偉, 值得參觀. 而且更走了幾百級樓梯上了教堂的頂眺望整個羅馬. 不過在羅馬的最後一天只有半日的時間, 更碰上全程最差的酒店, 寄存行李及late check-out 都要收額外費用, 只好早一些到機場, 反正也要花點時間讓友人辦退稅. 就此整個意大利之行終於完滿結束了.

意國行 - day 14

羅馬 - 天晴
再接再勵, 再到梵蒂岡, 這天輪到在聖坡得大教堂內有儀式, 一樣關閉. 於是往側門問清楚守衛, 確定了次日一定開放, 才馬上轉戰競技場. 競技場給我的印象頗為深刻, 原來古時的建築經已十分先進. 之後再到了古羅馬市集, 原來地方是很大的, 可以行上大半天. 此後在部份團友去shopping 的時候, 獨自再去了羅馬歷史博物館. 原來一張票是可以進入四個不同地方的展館, 但因時間關係, 只可以去兩個展館. 兩個館都有很多的藏品, 原來羅馬真的要很多時間才可行完的. 的確是一個歷史名城.

意國行 - day 13

羅馬 - 天晴
一早便先往梵蒂岡, 誰知原來當天在聖坡得廣場有儀式進行, 教堂關閉. 只好馬上轉到博物館, 意外地發現沒有太多人, 不用排隊便可進入. 果然是館藏豐富, 足足行了一個早上.
之後順序到了聖天使堡, 一間頗有特式的餐廳午膳, 西班牙廣場, 許願池, 威尼斯廣場, 萬神殿, 最後在黃昏時到了競技場拍了夜景. 晚餐到了酒店附近的一間餐廳, 總算正式的請了友人吃了一餐.

意國行 - day 12

卡布里島+拿坡里 - 天晴
索倫托原來大部份的遊客都是退休人士, 到了卡布里島反而發覺原來有很多日本人到島上遊覽的 (可能是遇上日本團吧), 不過兩個地方都一樣是感覺很新, 在天然的地形上建了很多新的商店, 而且大部份都是名店. 不過如只為欣賞天然地貌, 它們都會是一個好地方, 而且卡布里島有個著名的藍洞(也因時間關係沒有前往). 在島上嘗了當地的檸檬酒, 其實都十分可口, 有重重的檸檬味, 和平時喝加 lime 的酒味不同, 如果不是考慮到有太多行李的話, 會買一瓶的. 其它較有特式的算是島上的小型巴士, 島上的路太窄了, 巴士司機相遇的時候都是後鏡差點碰到後鏡的擦肩而過, 果然功多藝熟.
午後乘船到了拿坡里, 也因時間關係只到了兩個地方, 連本想去行一行的蛋城都去不了. 拿坡里給我們的印像不太好, 很亂, 而且亦碰巧遇上了警察追冒牌貨小販, 不過在火車站買上火車吃的pizza 郤又頗為美味, 如果當時趁熱時吃的話一定更好吃.

意國行 - day 11

南下 - 天晴
離開佛羅倫斯, 南下先到了西耶納. 到了著名的貝瞉形廣場, 但因中途還要趕到羅馬先寄存行李(這是朋友的英明建議, 因此不用在還車後提著大件的行李), 所以沒有時間久留, 不然應當在廣場上嘆一杯咖啡.
進入羅馬和離開都被交通阻遲了一些時間, 以致時間越加緊迫, 午餐只在中途隨便吃個三明治及喝個咖啡. 眼看GPS顯示到達時間距還車時限有大半個鐘頭, 但郤遇上塞車, 開始令人有點心急. GPS顯示的到達時間越來越遲, 入完最後一次汽油後只剩不到三十分鐘, 雖然途中望向索倫托的風景的確很美, 但郤沒有多大的心情欣賞. 進入了索倫托後, 還因交通擠塞令行車緩慢, 而且GPS 顯示的地點又和 Avis 地圖所示不同, 結果在時限前五分鐘才到達還車地點. 這是全程最驚險的經驗.
當日的晚餐是杯麵, 這是因為之前怕不習慣意國食物而帶了但一直都沒有機會食(看來我們頗適應意粉和pizza). 有趣的是取熱水時櫃枱的人說從未見過杯麵, 還笑稱這一定是 Chinese Spaghetti (雖然杯麵這沒有品味的食物一定不會被意大利人欣賞, 但請記著: 1.意粉本來就是中國傳過去的. 2.杯麵是日本造的).

意國行 - day 10

佛羅倫斯 - 天晴
經已行過了大部份的景點, 一早便再上廣場再從不同的光線角度拍照. 經過多日的經驗, 開始知道原來要拍攝得清楚, 每天都只有某個時間可以算比較理想, 因此友人都會嘗試在時間許可時再到一次景點拍照. 跟著當然是shopping 的時間, 在Gucci 店內認識了一位本來是香港人的店員何小姐, 幸運的有人可以用廣東話向我們解釋退稅的詳情.
因為前一天出外晚餐時發現了一個在歐洲四處擺買的流動市集剛好會在我們遊覽佛羅倫斯的幾天在聖十字教堂外的廣場, 所以下午最好的活動便是到此一行. 在這可以吃到不同地方的小食, 又有不同國家的小賣攤檔. 我們有見到的包括匈牙利, 德國, 荷蘭, 法國, 還有很多的檔因為沒有上前查問而不知他們是從那個國家來的. 前天的晚上已試了五歐元大大隻的德國豬手, 這天再試了幾個不同攤檔的食物.
再走回購物區時碰上了在街頭畫畫的人, 仿畫的名畫的確很神似. 這天晚上到了朋友介紹的餐廳用膳, 嘗了何小姐說一定要試的佛羅倫斯牛排, 也吃了全個旅程最貴的晚餐.

意國行 - day 9

佛羅倫斯 - 天晴
正如旅遊指南所講, 所有的名勝都可以步行到達. 在廣場上一眼可以睇晒的各大景點, 結果在一天之內便行完 (當然如果每個地方都進入詳細參觀的話, 是會需要很多時間的). 還有是因為太多地方都有大衛像, 沒有去藏有它真身的美術館. 有名的大教堂看來不及其它地方的教美, 朋友亦說它的內部沒有像米蘭及威尼斯的精細, 可能是我們真的不懂欣賞吧. 不過我們也有留意到它外牆的裝飾(都是指南內有說的). 這天, 終於有在大廣場的露天茶座中進食午餐, 而且還邊吃邊遠距離欣賞大衛像的仿製品. 其實如果想悠閑的慢慢走走看看, 佛羅倫斯確實會是個很好的地方.

意國行 - day 8

五漁村到佛羅倫斯 - 天晴
離開五漁村到了 La Spezia 參觀了海軍博物館, 也進行了購物. 之後到了一個很小很小的城 Monteriggioni. 環境很特別, 而且之前看書讀到了有關這個城的歷史故事, 本以為可以上城牆行一圈看看附近的地方, 但原來城牆經已有部份倒塌, 只有一小段可行, 那便再沒有行的意思了. 晚上到了佛羅倫斯, 但因GPS的問題, 轉折了一會才找到酒店. 但這一酒店為全程中最好的酒店, 早餐.英文.服務.查詢等都令我們十分滿意.

意國行 - day 7

五漁村 - 天晴
早上下了一場雨, 以為天氣會轉壞, 但早餐後已轉為天晴, 可以進行行山的行程. 如雜誌介紹, 風景優美, 山徑亦十分易行. 但因全程需時照過五小時, 只選了開頭兩段去行. 而在最美的一個漁村的前後行上山拍幾張照片. 度過了平淡但充實的一日. 不過發現了原來所提供的火車班次表不太準, 原本應沒有車的時間居然給我們乘搭了可到目的地的火車.

意國行 - day 6

農莊 - 天晴
早上享用了農莊供應的早餐, 橄欖油是農莊主人Daniele 的出品, 蛋糕由他妻子親自製造, 都很美味. Daniele 用了兩個多小時介紹了他的農莊, 葡萄酒及橄欖油的製造過程等. 明白了用不用木桶釀酒的分別, 也明白了初榨橄欖油是什麼. 我們本想購買酒及油各一支以感謝他的熱情招待, 但他郤堅持送給我們作為禮物, 還送了一小盒用來釀酒的葡萄給我們駕車途中享用. 此一站是我個人全程印象最深的一個地方.
起程往五漁村, 途經比薩一站, 參觀了有名的斜塔, 不過只是拍拍照, 停了一會便再上路, 做了和一般旅行團一樣的行程. 到了伽俐略曾任教的比薩大學一行. 也到過了一間大型的雜貨店, 價錢頗便宜, 可惜沒有適合的產品.
到五漁村check in 後, 晚上再出了La Spezia 晚膳及購物, 發現 La Spezia 原來亦有很多可去的地方, 之後離開五漁村時可以去走一走.

意國行 - day 5

威尼斯到農莊 - 天晴

一早在威尼斯取車, 雖有一段時間沒有駕棍波車, 幸好仍能操控自如, 沒有死火的情況出現. 早上由於想省回一點路費, 在GPS 上選了不用繳費的公路, 花了一個早上才到了在托斯卡尼中的outlet mall. 而且更要在剛坐上棍波車便行迂迴曲折的山路, 上上落落更有超過五連的彎路. 往後都不再選不用toll 的路了.

在到了outlet mall, 發現了一個很大的停車場, 給了同行友人一個操練棍波車的機會, 此後可以兩人輪流駕駛了. 黃昏時到了農莊, 認識了農莊主人 Daniele, 他介紹了附近的一間傳統意大利餐館給我們, 連酒水及甜品都不過四十一歐元, 是全旅程最抵的一餐. 不過可能多喝了酒, 回程到農莊泊車時出現了兩次死火的情況.

意國行 - day 4

威尼斯 - 天晴
到了每本旅遊指南都有介紹的兩個島, 看出名的玻璃及色彩鮮艷的小屋. 看到了做玻璃的過程(大件的作品和小手工都看到了), 雖然之前在小樽都看過一次, 但在威尼斯看的好像更精彩. 彩色的小屋也真的很吸引, 可能是沒有太多的小河及地方較小, 反而覺得這島比威尼斯市內更好(也可能只是遊客較少吧). 本想坐下來吃過午餐, 但因為想趕船回去再行市中未去的地方, 只好又再一次買pizza作午餐. 因應翌日一早要往租車, 實地去考察了環境, 順便預先查問可否將訂了的車改為自動波車, 但發現的是當地人真的不喜觀駕自動波車, 未問完問題已被不屑的答 NO! 不過在回程中郤在巴士站旁的cafe 喝了杯好味的espresso.

意國行 - day 3

威尼斯 - 天晴

用腳行遍了市內的主要景點, 要坐船去的地方留在第二天才去. 全城都是在河邊的小屋, 很有特式. 但老實說, 看多了便不再覺得有多大的特別, 街道大窄了, 而且亦太多遊客(雖然我們都是遊客), 有時從一個地方去另一個地方很不方便. 開始懷疑, 除旅遊有關的行業, 威尼斯是沒有其它工作做的.

發現了幾個地方, 聖馬可廣場的地下是有海水倒灌的, 渠口的水不斷湧出. 剛好有第十一屆威尼斯建築雙年展舉行, 可惜展館離市中心太遠, 而且亦要收十多歐元, 只有參觀了兩個在附近的別館並拍了照給友人參考. 還有的是路邊的pizza店, 一次過見到了所有的口味, 看起來很吸引, 馬上每人買了一片作午餐.... 開始了我們沒有正式吃午餐的習慣.

意國行 - day 2

米蘭 - 多雲

到了米蘭大教堂及附近的拱廊, 也在名店區閒逛了一會, 並且發現了在離火車站不遠的地方有個本地街市, 在它附近的小店也很便宜. 真的要行的話, 我會想在街市附近多逛一些時間. 到差不多黃昏的時候, 便要趕到火車站往威尼斯了. 在多個有去過的意國火車站, 米蘭火車站算是最美的一個, 亦有很多的店, 十分方便. 補充一點, 最難吃的晚餐也在前一天在米蘭嘗到了!

意國行 - day 1

米蘭 - 天晴

可能是停留的時間太短, 但按介紹及他人的意見亦不見得要花太多時間在此. 有行過米蘭古堡, 而且亂打亂撞的碰上了免費參觀裡面的博物館. 要提的是從地鐵站走到聖西路球場是很遠的, 一定要坐車... 否則如我一樣... 過其門而不能入.  不過全個旅程最好吃的午餐郤在米蘭的餐廳嘗到了 (不過, 原來我們有正式吃午餐的日子不多).

遊客

上個月友人從星洲回港, 晚上經過荃灣時對身旁的新大廈拍了照片, 當時佢話估唔到離開不夠一年回來經已像個遊客般到處拍照.  不足一周後, 便到我到番邦做個名符其實的遊客了, 所以都跟佢一齊影張相去實習實習.  不過此行他返到星洲後又未知何時再聚, 唯有寄望下次再回歸時再出去大玩大吃大喝一番.

同場加影

在雙魚河的馬房, 見到多匹舊日在馬場上馳騁的良駒, 因記憶所限, 已忘記過往大部份的馬名, 所以只有替印象中熟識名字的馬匹拍照留念. 但另有一馬匹權勇駿一直低頭食草, 未能拍得牠的廬山真面目 (註: 權勇駿在馬會記錄中尚未退役).
天氣實在太熱, 而且烈日當空, 因此只見在有蓋的沙圈中有馬匹在踱步, 根據烙號返查記錄, 原來圈中的是大地回春, 雖然此馬從未入三甲, 但不知甚麼原因卻記得此一馬名 (可能因為是以為牠與妙手回春有關係吧). 在途中亦見到另一馬匹, 不過見不到烙號, 但見佢毛色同身形都唔錯 (其實我唔識睇), 所以拍下牠的英姿.

放草

今個暑假有幸可以到雙魚河放草. 入面的設施雖然唔算真係好齊全, 不過都算夠玩, 而且環境真係一流. 大熱天時入去行到身水身汗時又可以跳入去泳池度消下暑 (不過池水曬到變左暖水). 如果天氣唔係太熱重可以租架單車玩下, 佢有條環境唔錯的公園仔單車徑 (不過似符適合小朋友多d). 如果唔係班 trainer 去晒韓國, 重可以騎埋馬添. 夜晚無咁熱都打左一陣網球, 都算唔錯. 最一流係入面係唔需要用現金的, 因為只有會員的信用咭先可以登記享用會內設施, 所以在入面基本上同去好似 clubmed 咁d resort 無乜分別 (不過我未去過, 唔知其實係點).
照片中的餐廳有馬具作裝飾, 但佢 last order 居然在 7:00pm. 會唔會太早呢? 住的渡假屋格局有少少似外國的 motel, 可以泊正部車在門口. 行入去的路亦係個優美的綠化環境, 有馬會的專業照料 (同財力支持), 入面的大樹就算變成古樹亦絕不會倒塌 (政府如能向馬會好好學習, 市民的生活該可以有多點保障). 感受過呢次賓至如歸的享受, 如果有機會真係要再去多次, 話晒我都算係有少少貢獻丫.

家樂坊

日前到旺角走了一轉, 並到了家樂商場購物. 果然真係成個場都係後生仔女, 入到去都覺得自己去錯地方! 不過有時碰啱有野要買, 真係一定要去呢D地方走一走. 唔去亦都唔知道完來呢個地方經已改名做家樂坊, 真out!
買完野經已拿拿淋想走番出來, 點知又再一次迷失方向, 真係依然保特到商場白痴呢個稱號, 唔知點解行馬路地方大咁多反而無咁易蕩失路, 真奇怪. 無論點, 總算完成任務, 希望呢位朋友 (無錯, 係朋友) 生活同工作都愉快, 重有係一路都保持住一份誠懇同天真.

come n join us

間中都望見呢件衫仔, 佢都掛左响度好幾年. 記得第一次捐血是在88年的暑假, 當時只係咁啱路過, 貪得意同想check下乜野血型先走入去, 並無諗過話捐血救人咁偉大(當然依家都無咁諗). 不過自己亦都記得以前細個時家父有試過因胃出血而嚴重到要輸血, 諗起原來要輸血都唔係一件唔普遍的事. 而翌年在一份暑期工之中因為有提及大口環此一地區而得悉原來有D小朋友係需要血庫有充足血液先可以進行矯形手術, 有D小朋友明明排好期做手術, 但始終都唔係有急切性需要, 如果咁唔好彩撞啱有大車禍而需要大量血液, 咁佢地的手術就要擱置同唔知又排到幾時先可以做. 不過原來有時有D小意外都會有可能需要輸血, 所以唔怪得紅十字會間唔中都話血庫唔夠血而呼籲大家踴躍捐血.

晴

又一個天朗氣清的日子... 空は空

重複犯錯

一連幾日要開工, 終於在昨日完滿結束. 完滿係因為都算有好評, 原本以為佢唔得, 點知原來都掂喎. 以為人地會以為係理所當然, 其實都唔會係完全當老奉. 所以真係唔好犯迷信呢個錯. 辛唔辛苦都係工作一部份, 其實過左之後就唔覺辛苦, 反而天時暑熱要長途拔踄往來會展先係最辛苦. 就等於睇d運動員連場大戰咁辛苦, 其實之前的訓練先係最辛苦. 不過見到佢地堅毅不屈咁比賽, 又真係幾感動, 但係咁多年以來最感動的, 始終都係香港人的一句說話!

8號波

得閒無事走去睇下d後生的blog, 估唔到咁後生都走去學人話出到社會做事先感覺到想快樂係一件奢侈的事! 又話無喘息空間. 睇來原來我真係個反應慢的人. 我要做左成四五年先發覺世途險惡, 而且重盟塞到唔識改. 如今的後生真係早熟同醒目.
不過再睇, 又發現原來自己都無乜真係話好開心好快樂的時刻. 人地一大班人堆埋間房度做project都可以咁開心, 諗番原來我係無d咁樣的日子, 不過諗落都會有少少, 但又唔會好似人咁開心, 只會覺得以前有d無聊... 點解好似真係未試過要做d咁認真的功課? 可能我真係成世人都咁求求其其, 做人同做功課都係一樣, 無要求、無味覺、無主意、無所謂... 咁都好, 一條無起伏的直線就唔會有咁多不如意的感覺. 其實, 到左某日乜都唔知同無知覺的時候, 之前的一切又有乜分別呢?
唔明白的重有係... 點解會話又要搬? 重要係唔記得搬過幾多次? 我諗呢d係叫做青春...

坐談會

昨日又再一次監聽坐談會, 有人問: 聽得多係唔係會覺得好悶? 咁其實我又唔會咁覺得, 我諗從每一次的內容中都應該可以學到一d新野 (我係指英文中的learning). 對於自己來講, 起碼經過咁多次的經驗, 都從中體驗到點樣唔好瞌眼訓 (當然之前讀過下research都有幫助, 所以畀左d錢都唔係白費). 係, 無錯, 之前我真係會瞌眼訓, 咁我諗起碼我知到呢個問題而又有去改善, 都算係咁啦.
附圖係間房的格局, 不過影的目的並唔係要做記錄, 而係我幾鍾意牆上面的pattern, 我有件衫都好似係差唔多咁樣, 如果有一日我會裝修得間屋靚靚地, 都可以考慮用呢個pattern.
坐談會之後約左個朋友去飲野, 算係同佢預祝生日. 結果飲到成三點先番屋企, 亦都好彩今日打八號風球, 如果唔係都唔知點返工做野.

濠會

相傳話入左會會有免費飛去澳門, 其實都係事實, 不過對上兩次去都唔醒起去登記番. 不過, 又好似話D飛要排好耐先拎到, 又好似話 promotion 又好快就完咁. 不過唔好講咁多, 下次去都係去左入會先, 唔係到下次有 promotion 時又係 enjoy 唔到, 反正香港地都無乜地方好去, 個零鐘頭船, 同去南區或入個新界都無乜分別. 如果昨日經已有張咭在手, 咁就可以義不容辭...

迷信

堅持自己的信念, 絕對無乜唔啱. 認同你的, 自然會接受你的想法. 不認同你的, 只因那人亦有自己的堅持.

呢個世界, 有人信耶蘇、有人信風水、有人信科學、有人信自己、有人信因果、有人信星座.... 無話邊個啱、邊個錯.

以前D人都唔信地球唔係圓的, 牛頓之前亦無人知乜野係萬有引力, 發現細菌前個個都以為瘟疫係天讉, 到而家霍金又話發現萬有引力原來應該係量子力學先啱 (牛頓計錯數?) 除左丁蟹, 又有邊個敢話自己啱晒?

所以都係唔好諗咁多, 行下行下自然又會有出路. 同埋可以信下上斜坡的理論.

咁又一個旅行團

途經桂林街，突然見到人山人海，重以為有乜特別大事件，原來係有團體搞左個睇舊樓旅行團。人多到係部份人上晒樓上，樓下又企到阻住條街，未入到去的重要在對面馬路間廟前面排隊等。你問我呢D野值唔值得睇？我真係唔識答。可能我一兩歲時都住過下咁上下的屋，而且以前去拜年都探訪喎差唔多的地方，我個人唔覺有乜特別。不過，有時我地畀過萬蚊去旅行又咪係去睇人地D舊野。有時D舊野唔留返D，真係好可惜；不過又都無理由全部留晒，正所謂舊野唔去，新野又點會來。邊樣留，邊樣唔留，我唔識分，都係留番畀D有見識的人士去決定。我都係繼續畀錢去睇人地D舊野算吧啦！

廉記

今日外出工作, 唔知係因為乜野原因, 真係傾巢而出 (事情的發展, 其實我一早都估到). 而拍攝對象係上面見到的廉記, 原來佢係叫做Raymond. 個人真係好nice, 工作態度就算無一流都只係 1.1, 唔會係排第二的一類. 不過今日天氣真係幾熱, 而佢原來同我都一樣係咁大汗, 見佢都真係幾辛苦. 合作做的雜誌同事亦都係一個唔話得的人, 好好人、好合作又好幫手, 在此祝願佢早日心想事成.

人氣?

幾時落雨, 幾時好天, 真係估佢唔到, 好彩天文台都已經算係幾準下, 不過上次睇完都畀佢誤導左一野. 重有係, 尋日明明連續幾日都黑雲閃電, 今日就經已全部換返有太陽公仔, 咁都好難話佢準定唔準. 落左咁多日雨, 都算終於好番下, 起碼用眼都睇到係好天.

後備補出

有得出, 點都好過無得出. 不過, 係無得揀先至揀, 定係唔好蝕抵所以先至揀, 到底係邊一樣? 好似前面咁多杯野, 你點揀? 咪又係睇你中意乜囉. 無所謂所以就唔緊要, 同以前睇壹號皇庭講的一樣... 不過, 睇完, 過左就唔會有人記得, 亦唔會有人明!

分別

手痕貪得意影下啲車仔, 順便試下部相機影微距, 估唔到又試到啲野. 原來加多少少燈光影啲野真係會唔同晒. 影相, 真係要去學架!

係時候抖一抖...

以前試過好忙好忙的工作, 不過忙極又都唔覺攰, 兼且做野重鬼咁爽手. 而家都唔知係做乜, 明明都唔係咁多野做但係就點都無以前咁有效率. 不過話唔知點解其實係呃人, 自己問心都知係因為環境問題, 有時都想問.... 只係得自己一個勤力, 個個五六點走晒, 你就做到八九點, 咁 又有乜意思. 其實 如果想講團隊精神, 不如之前參考下naruto先.

告別朱江

多年前享用了政府的進修基金報讀了一個課程, 其中包括影視製作, 適逢在別號朱江的一位同事告別晚會上拍了多條影片, 特別剪輯了一條短片打算送作記念之用, 可惜因檔案內容太大而傳送失敗. 本想日後有機會再傳交... 不過幾個月之後, 佢經已返番來做番同事...

任務#01

呢三件就係我第一單幫朋友越洋購買的玩具模型, 只要係以前有睇過三一萬能俠的朋友都會覺得呢三隻野無得頂. 我畀過呢張相同事睇, 因為佢都鍾意玩模型, 佢都驚嘆話:「你朋友真係犀利, 唔止捨得買, 最犀利係重捨得拎出來玩.」我都有同感... 不過再之後, 我又諗... 如果全部野買左都只係收入個盒度, 咁買返來又有乜意思呢? (不過買來炒又另計)

繼續車

今次都係車, 張相攝於2002年7月27日(電腦科技真犀利, 你問我就一定唔記得係幾時影!), 拍攝地點係住左廿幾年的屋村樓下, 不過當時己經搬走左, 舊屋亦都拆埋.
部車係朋友讓的, 不過都唔夠一年就再買返出去勒. 嚴格來講呢部係第二部擁有過的車, 第一部係大發仔細車, 只係六千蚊貨仔但係都玩左成三四年. 車牌重好清楚記得係 EV4120 (唔知點解呢樣又記得). 不過都係一樣, 都無幫部車影過相.

前車可鑑

其中一部以前的電單車 Yamaha SR250, 呢部車係一部好車, 簡單好用, 而且坐呢部車的日子亦都幾開心. 可惜之前其他坐駕無影低相, 只有呢兩部有相為証.
重記得, 第一部係同朋友夾的本田, 用左有成五年, 雖然炒到個殼都爛晒, 但依然有心有力, 不過最後電器老化, 始終都要退休.
跟住就係 Yamaha, 之後重有部台灣 T-Rex, 不過因為漏機油而 engine 打柴. 再轉左部 Suzuki, 不過本身佢己經係超過十年車, 所以見有部車都算幾合心水, 就換左家陣用的星艦.

被封印的15公里

有影到朋友部車, 諗落都應該影下自己部車留念. 型號係叫星艦150. 以前一路聽人叫星艦都以為係部大羊, 唔大點叫做 "艦" 呢?
不過呢部車有個特別的地方, 就係個咪表原來比正常時速快左15公里. 係有一次跟住小巴車尾時睇住人地個車速表發現的. 試過跟過唔同的小巴得出的差速都係一樣. 三四十公里時都唔覺有差好多, 一上到70公里以上就會出現15公里的差別, 真係神奇. 唔怪得每次入東涌開到盡 110km/h 都逢車過車(畀人).

馬交十二小時

昨日到澳門一遊, 商量旅遊大計之餘亦順路遊覽威尼斯人...
早上九點幾坐船到澳門, 先到葡京飲茶, 之後當然係全日最興奮的駕車之旅, 今次的坐駕為 Yamaha 大羊 (見上圖). 上了一轉山頂醫院, 再由西灣穚過東亞大學, 入正題傾完旅遊大計再折返澳門 (因天雨關係, 往後行程轉由本田私家車代步).
Yamaha 的表現十分滿意, 寧靜之餘亦馬力十足, 以為轉彎會因車身長度關係而稍為困難, 點知就算在澳門街又斜又窄的小路上亦能得心應手,十分穩定, 加速時後腰貼住小靠背的感覺足可媲美私家車. 可惜香港的街位十分狹窄, 一定會刮花車身, 否則下次換車可以考慮.
威尼斯人之行可算令人失望, 名過其實. 外牆全部門窗只為裝飾, 虛有其表, 內裡係一個有幾條水溝的大商場, 昏昏暗暗... 唯一係發現裡面的 Gondola 原來係有摩打的...
晚飯於小飛象再加清平直街食糖水, 行過之前咁多次都未行過的福隆新街 (好過行威尼斯人...)
後記: 過親澳門, 都要朋友出錢出力, 重出埋車. 佢過香港我反而無咁好招呼, 真慚愧. 識得呢位朋友都算三生有幸.

維德廣場

昨日去上環, 不經不覺行到維德廣場 (其實係落錯巴士先), 突然又諗番起以前在上環返工的日子. 可能以前無咁多野諗同後生, 雖然日日返到去都好多野做, 但係都唔覺話好辛苦, 而且又無乜唔開心. 唔知點解就用電話影左張相記念下, 不過亦唔知點解, 明明係話影維德, 點解又影左出面條街.... 唔明. 不過我記得以前望呢個方向都未有呢座大廈.

試機照片

咁都唔差在post埋兩張試機相.
早排連逐兩個同事去日本, 都問我借左部 3G 電話去用, 搞到我幫朋友買完模型都無相機影相 send 畀佢先睹為快. 諗落都係不如正正經經買番部相機放响屋企睇下門口. 反正遲 D 去意大利都應該要影下相留念.
部機係 Rollei da80, 只係入門貨式, 不過對我來講經己夠晒用. 拿, 遠近都影得幾清楚..... 有乜問題? 係 D 顏色好似唔係好準同埋 D 相無乜立體感, 真係唔知解...
會唔會唔關部相機事呢....?

軍火

影開相send畀人, 唔差在post埋上網做個記錄, 反正試完個blog function 之後都唔知有乜機會再用呢個blog, 不如擺下無謂野, 等第日笑下...
其實, 去打 wargame 只係靠支MP5K, 支G23只係用來扮下野, 不過又真係試過支MP5無電之後齋用支G23又頂到一陣.
得閒一齊去打番場啦...