紀律

今次要幫手外影的地點係黃竹坑警察訓練學校，呢d難得去下的地方梗要影返張相留念，尤其係見到地下由日積月累步操留低的白印。因為記得之前曾經有人叫過，自己亦都諗過不如玩下童軍呀，民安隊呀，醫療隊呀咁... 但始終諗到實要經過步操、次次出席又要擦靚對鞋、又有好多規矩... 所以都係怕怕。個人來講最怕就係守規矩，真係千祈唔好同我講紀律，口口聲聲講teamwork就更加怕怕﹝如果有以身作則又唔同﹞；總之畀得嚟就會做得好好睇睇，要合作的一定會盡量合理地配合。再望返d步操痕，又再諗起自己真係無鬼用一d毅力都無學乜都半桶水，不禁在心裡面對所有努力不懈、有恆心、有毅力的人敬禮！
想順帶一提係見到戰術訓練大樓，記得電視影過佢入面應該係模仿典型香港街道的實景，唔知可唔可以租返一日來打下wargame呢？至多我唔租佢d警槍。

蜀道難

趁清明復活五天連假到巴蜀一遊，簡單的行程，簡單的生活，雖然每天都早起趕行程，但感覺上是悠閑的。
古詩有云，蜀道難難於上青天；說的想是當地一帶地勢險要，必須攀山涉水以通行其中。
坐小火車到了農村一遊，發覺在未開發地方的生活其實並不如想像中艱苦，沒有五光十色的繁華，平淡的生活其實更令人嚮往；每天的體力勞動，是順理成章的日常生活；要說苦，只能道城市人實在過的太安逸了。
坐著以煤作動力的火車，想到人民的生活是很諷剌的越來越艱難；從前以小火車小規模的開採煤礦，半世紀來平穩無事。現在為金錢大規模過度開採，每日在酒店的電視機前看的都是礦難的新聞；為了利益可以妄顧安全，開發進步了反而更多難日子，中國人的路真的難於上青天？

標籤

唔明白點解好多時啲人都鍾意將一班班人加個標籤。乜野X世代、Y世代，優皮，港女、港男，中女、剩女，上等人，八十後...。更加有來自東洋的各種稱呼：電車男、御宅族、Lolita、草食男...。同時又鍾意自己圍埋搞啲乜會物會，中產大聯盟、同牌子車會、分黨分派...

係唔係有咗個名號之後大家就會覺得自己好有代表性？覺得有一班同聲同氣的同志？定係人性本身就係鍾意埋堆，搞起個小圈子就可以鞏固勢力，埋到個勁堆就可以為所欲為、畀人知你有靠山？又抑或加個標籤畀人就覺得自己高尚咗，可以對人任意揶揄？

以前睇過一部活地阿倫的電影，佢在裡面係唔會加入任何的會社，因為佢覺得以佢一個咁無水準的人都有會社肯收佢的話，個會的水平都會係低到唔值得入。呢個個人嚟講好認同，所以免得過都唔會入啲乜會物會，亦都盡量唔好埋或黐到人地堆，廢事拉低人水平兼影衰哂人地。 (所以，最近貼住咗個車仔貼紙，唔使怕會陀衰人。)

其實，最無謂係，搞埋一堆到最後又唔啱牙，人地嬲你又唔知，又要畀人覺得你地重好團結；都係鍾意嗰句....無拏掕就最襟玩。